تاند: ( سې شنبه، د سرطان ۲۰ مه)  په کابل کې د طالبانو حاکم رژيم د افغانستان لپاره د پاکستان د ځانګړي استازي آصف علي دراني د وروستیو څرګندونو یوې برخې ته غبرګون ښودلی.

د طالبانو مرستیال ویاند بلال کریمي، د دراني هغه خبره رد کړې، چې ګواکې دوی د پاکستان په غوښتنه، د ډیورنډ کرښې له نیږدې سیمو پاکستاني طالبان نورو سیمو ته لېږدولي.

کریمي ویلي، چې پاکستاني طالبان په افغانستان کې حضور نه لري او دوی هم چېرته نه دي لېږدولي.

مخکې د طالبانو ویاند ذبیح الله مجاهد ویلي وو، چې د پاکستان د اندیښنو د لرې کیدو لپاره د ډیورنډ کرښې له نیږدې سیمو څخه د وزیرستان کډوال نورو سیمو ته لېږدوي.

د مجاهد په خبره، پاکستان د دغو کډوالو په لیکو کې د پاکستاني طالبانو  د موجودیت اندیښنه لرله.

د پاکستان ځانګړي استازي په تازه څرګندونو کې یې ویلي، چې طالبانو نورو سیمو ته د پاکستاني طالبانو د لېږد بهیر پیل کړی، چې دوی یې د پيل هرکلی کوي او د ښو پایلو هیله ورڅخه لري.

نوموړي همدا شان د افغانستان په خاوره کې د ترهګرو ډلو د ځپلو لپاره د پاکستان او امریکا د مدعي هوایي بریدونو ننګه هم کړې او ویلي، چې دا بریدونه د ملګرو ملتونو د امنیت شورا د پریکړه لیک له مخې کیږي.

طالبانو د پاکستاني استازي دغو خبرو ته غبرګون نه دی ښودلی.