تاند:( چار شنبه، د قوس درېیمه)د امریکا د بهرنیو چارو وزارت له ترهګرۍ سره د مبارزې څانګې ویلي، چې په افغانستان کې د داعش ډلې مشر ثناالله غفاري، چې په شهاب المهاجر مشهور دی، پخوا د مخکیني ولسمشر اشرف غني د لومړي مرستیال امرالله صالح د لومړي معاونیت په چوکاټ کې امنیتي ګارد و.
دغې ادارې د نوموړي کس یو کارت هم خپور کړی، چې دی پکې د امرالله صالح د ګارد غړی ښودل شوی.
ثناالله غفاري اوړمه ورځ د امریکا متحده ایالاتو له لوري د درېیو نورو افغان داعشیانو په ملتیا د ترهګرۍ په نړیوال نوملړ کې شامل او بندیزونه پرې ولګول شول.
امریکا ویلي، چې غفاري په ۲۰۲۰ کې د داعش د افغانستان برخې مشري پر غاړه اخیستې ده.
امرالله صالح بیا دې خبر ته په غبرګون کې ویلي، چې غفاري تر ۲۰۱۵ پورې د حقاني شبکې فعال غړی و او د همدې شبکې له لوري یې لارښوونه او ملاتړ کیده.
د صالح په خبره، نوموړی له اوږدو کلونو راهیسې تر څار لاندې و.
ده زیاته کړې، چې غفاري انجینر دی او کورنۍ یې په پاکستان کې ژوند کوي.
د صالح په وینا، ملي امنیت په شکر دره کې د غفاري له ټولې کورنۍ سره مرکه کړې او هغه په افغانستان کې د داعشیانو عمومي مشر نه دی.
ځینو نورو سرچینو ویلي، چې غفاري د صالح د ځانګړي ګارد غړی و ، خو د هغه د نیږدې کسانو په وسیله یې د وسلې جواز ترلاسه کړی و.
ویل شوي، چې غفاري د کابل له پولي تخنیک پوهنتون څخه فارغ شوی او ۳۱ کاله عمر لري.
سي بي ایس ټلویزون بیا ویلي، چې داعش ډلې د طالبانو په منځ کې هم نفوذ کړی، خو د طالبانو د کورنیو چارو وزارت ویاند سعید خوستی دا خبره نه مني.
یوې بلې سرچینې ویلي، چې د غفاري په خپور شوي کارت کې تورن جنرال عبدالستار قاسمي د لومړي معاونیت د محافظتي قطعې مشر ښودل شوی، په داسې حال کې چې نوموړی د ولسمشر د لومړي مرستیال په توګه د مارشال دوستم د دندې پر مهال په دې دنده کې و.
د سرچینې په حواله، قاسمي په ۱۳۹۸ کې چې صالح د ولسمشر لومړی مرستیال و، په ارګ کې هیڅ مسوولیت نه درلود.