تاند (پنجشنبه د وري – حمل ۲۷مه) په لغمان ولایت کې تېره شپه د یوه کور چت غورځېدو له امله یو کس مړ او د ښځو په ګډون پنځه نور ژوبل شوي دي.
دغه پېښه د دولت شاه ولسوالۍ کې رامنځته شوې ده.
په دغه ولایت کې د طالبانو د حکومت د طبیعي پېښو پر وړاندې د مبارزې او چمتووالي رییس قاري خیرمحمد غازي وایي چې، د پېښې ټپیان روغتون ته لېږدول شوي دي.
نوموړي زیاته کړې، چې دغه پېښه تر بېګاني سخت باران وروسته شوې ده.
دا پېښه داسې مهال رامنځته کېږي چې، د هواپېژندنې ادارې نن (د وري ۲۷مه) په ۲۱ ولایتونو کې د شړکنده باران، تالندې برېښنا، تېزو بادونو او سېلابونو راوتو اټکل کړی دی.
په خبرپاڼه کې ویل شوي چې، دغه وړاندوینه د نورستان، کونړ، ننګرهار، لوګر، پکتیا، خوست، لغمان، کپیسا، پنجشېر، پروان، میدان وردګ، بغلان، سمنګان، بدخشان، کندوز، بلخ، سرپل، غور، بامیان، دایکنډي او تخار ولایتونو لپاره شوې ده.