تاند/ چهارشنبه د لړم ـ عقرب ۱۳مه/ د افغانستان ملي سوداګر او د عزیزي بنسټ مشر میرویس عزیزي وايي چې، هېواد کې به د سرطاني ناروغیو درملنې روغتون چې اوس یې کار د پيل په درشل کې دی، نږدې راتلونکي کې جوړ شي.
نوموړي چې نن د دولتي شرکتونو عمومي ریاست او عزیزي انرژۍ شرکت ترمنځ د ډبرو سکرو له کانونو د استخراج او اکتشاف او همدارنګه د انرژۍ تولید په برخه کې د تړونونو لاسلیک غونډه کې خبرې کولې، ویلي چې یاد روغتون به د سرطاني ناروغیو درملنه په وړیا ډول کوي.
هغه دغه راز زیاته کړې چې، په دې پروژه کې به یو نسایي ولادي روعتون او د طب پوهنتون هم شامل وي.
عزیزي داسې مهال دا ژمنه کوي چې، تر دې وړاندې په ځلونو د داسې یوه روغتون د جوړېدو غوښتنه شوې او په بدل کې ژمنې شوي خو لا نه دي عملي شوي.
وبه لیدل شي چې عزیزي دا ژمنه پوره کوي که نه په داسې کې چې، تر دې وړاندې د برښنا په اړه کړې ژمنه هم لا پرځای ده او خلک د هېواد په لویو ښارونو کې څه چې په مرکز کابل کې هم برښنا په نشت حسابوي.