تاند (سې شنبه، د لړم/ عقرب ۱۹ مه)) د یوې اوږدمهالې څېړنې پایلې ښيي چې په مناسبه اندازه د کافین لرونکې قهوې څښل د مغز پر روغتیا مثبت اغېز لرلی شي او د ډیمېنشیا (د هېرې ناروغي) یا د حافظې د سختې کمزوري کېدا خطر کمولی شي.
دا څېړنه چې د امریکا د فزیولوژۍ ټولنې تر څارنې لاندې ۴۳ کاله روانه وه، ښيي هغه کسان چې په منظم ډول کافین لرونکې قهوه څښي، پر ډیمېنشیا د اخته کېدو اندازه یې د هغو کسانو پرتله ټیټه ده چې قهوه نه څښي.
د څېړنې له مخې، د قهوې په منظم څښونکو کې په کال کې د هرو ۱۰۰ زرو کسانو په منځ کې د ډیمېنشیا ۱۴۱ پېښې ثبت شوې وې، خو په هغو کسانو کې چې قهوه یې نه څښله، دغه شمېر ۳۳۰ پېښو ته رسېده.
څېړونکي وايي، هره ورځ د دوو تر دریو پیالو کافین لرونکې قهوې څښل د مغز د فعالیت او حافظې د ساتنې لپاره تر ټولو اغېزمنه اندازه بلل شوې ده. خو له دې زیاتې قهوې څښل کومه اضافي ګټه نه لري.
څېړنې ښودلې چې د قهوې دا احتمالي ګټې د هغو کسانو لپاره هم لیدل شوې چې د کورنۍ د مخینې یا جنیټیکي ځانګړنو له امله د ډیمېنشیا له لوړ خطر سره مخ دي.
په زړه پورې دا چې له کافین پرته قهوې ورته ساتندوی اغېز نه دی ښودلی، چې ښايي د قهوې په ګټو کې کافین مهم رول ولري.
په څېړنه کې د چای څښل هم د مغز له ښه روغتیا سره تړل شوي او هغه کسان چې هره ورځ یې له یوې تر دوو پیالو چای څښلې، مثبتې پایلې یې لرلې دي.