تاند، سه شنبه، د سرطان ۳مه: نن د امریکا د ملي امنیت د پخواني سلاکار هغه کتاب بازار ته وړاندې کېږي چې د ټرمپ په اداره یې د امریکا او افغانستان په تړاو سیاستونو باندې جدي نیوکې کړې دي.
جان بولټن په دغه کتاب کې ویلي، ټرمپ تل افغانستان لپاره د امریکا د حکومت پالیسي ناکامه بللې او ژر تر ژره یې له دغه هیواد څخه په وتلو ټینګار کړی دی.

پهدې کتاب کې د ایران، روسیې، چین او افغانستان په اړه د ټرمپ سیاستونو ته کتنه شوې چې لا له بازار ته راوتلو وړاندې یې جنجالونه او شور جوړ کړی دی.
جان بولټن په خپل کتاب کې د افغانستان نوم ۱۴۳ ځله او د ولسمشر غني نوم ۱۷ ځله راوړی دی، خو ویلي یې دي ټرمپ تر ډېره وخته فکر کاوه چې د افغانستان اوسنی ولسمشر هم حامد کرزی دی.

جان بولتون لیکلي چې، ټرمپ په ډیرو ناستو کې سره له دې چې له افغانستانه د ترهګرو د ګواښونو په اړه پوهېده؛ خو بیا یې هم له دغه هېواده د خپلو ځواکونو پر ایستلو ټینګار کاوه او ان په یوې ناسته کې چې د مایک پومپیو او پخواني دفاع وزیر جیمز مټیس په ګډون نورو چارواکو هم ګډون درلود، ټرمپ څو وارې د یادو چارواکو د خبرو په پرې کولو سره له افغانستانه پر وتنې ټینګار وکړ: (( ټرمپ تل ویلي چې افغانستان کې مو ماتې خوړلې، هر څه مو بایللي، هلته موجودیت مو تېروتنه ده، پریږدئ چې روسیه هلته ښکیله شي.))

بولټن ویلي، په ۲۰۱۸کال کې چې کله دی د ملي امنیت سلاکار وټاکل شو نو خلیلزاد ورته راغی او ورته یې وویل چې د طالبان یوه ډله له امریکا سره خبرې اترې غواړي: (( ما ورته وویلچې له طالبانو سره زیاتو لیدنو ته اړتیا نشته، د جولای په اخرکې خلیلزاد د طالبانو د اړیکو په پټ کانال بدل شو؟ او بیا افغانستان لپاره د سولې ځانګړی استازی شو.))

د امریکا د ولسمشر د ملي امنیت پخواني سلاکار جان بولټن همدا راز ویلي چې، ټرمپ په ۲۰۱۸ کال کې خپل ملي دفاع وزیر جیمز مټيس ته لارښوونه کړې وه چې په افغانستان کې جګړه په پوره واک سره پر مخ یوسي؛ خو کله چې د هغه د غوښتنې پر خلاف کار وشو؛ نو له افغانستانه یې د خپلو ځواکونو پر ویستلو ډير ټينګار کاوه.