تاند (شنبه، د لړم/ عقرب ۲۳ مه) د قطر امیر شیخ تمیم بن حمد آل ثاني او د ترکیې ولسمشر رجب طیب اردوغان د دواړو هېوادونو ترمنځ د ګډې دفاعي همکارۍ تړون لاسلیک کړ. د دې تړون موخه د دفاعي همکاریو پیاوړتیا او د پوځي همغږۍ زیاتول دي.
اردوغان د تړون په اړه ویلي: «د ترکیې او قطر ترمنځ د متقابلې دفاعي همکارۍ دغه تړون به د دواړو هېوادونو ورورګلوۍ اړیکو ته نوې بڼه ورکړي.»
قطر او ترکیه د پاکستان او اندونیزیا ترڅنګ د «بدر تفاهملیک» په نوم د څلور اړخیزې هوکړې برخه هم دي. دغه تفاهملیک د ۲۰۲۶ کال د اکتوبر په ۲۱مه په دوحه کې لاسلیک شوی و او هدف یې د دفاعي صنایعو، پوځي تجهیزاتو د جوړولو، د پوځي وړتیاوو د پراختیا او د څلورو هېوادونو ترمنځ د تجربو د تبادلې په برخو کې د همکاریو پیاوړتیا ده.
په همدې لړ کې د قطر امیر او د ترکیې ولسمشر د جمعې په ماښام د استانبول په دولماباغچې ماڼۍ کې د دواړو هېوادونو د ستراتیژیکې همکارۍ د عالي کمېټې د دولسمې غونډې مشري وکړه.
اردوغان د غونډې په پیل کې د قطر د امیر هرکلی وکړ او د دوهاړخیزو ستراتیژیکو همکاریو د پیاوړتیا او په بېلابېلو برخو کې د اړیکو د پراختیا لپاره یې د هغه هڅې وستایلې. نوموړي په سیمه او نړۍ کې د کړکېچونو د کمولو او د سولې او امنیت د ملاتړ لپاره د قطر دیپلوماتیکې هڅې هم وستایلې.
د قطر امیر هم د دواړو هېوادونو د اړیکو او همکاریو اوسني وضعیت ته په اشارې وویل، دوحه هوډ لري چې د دواړو ملتونو د غوښتنو او ګټو د پوره کولو لپاره خپلې همکارۍ پراخې کړي.
په دې غونډه کې د دفاع، سوداګرۍ، پانګونې، انرژۍ او زدهکړو په برخو کې د دواړو هېوادونو پر ستراتیژیکو اړیکو خبرې وشوې. دواړو لورو د سیمې او نړۍ پر مهمو بدلونونو، په ځانګړي ډول د سیمې پر وضعیت او د انرژۍ د نړیوالې عرضې پر امنیت هم نظرونه تبادله کړل.