د افغانستان او ازبکستان د سوداګرۍ او پانګونې خونو ترمنځ همکارۍ د بامیان ولایت د کچالو د صادراتو لپاره د ازبکستان بازار ته لاره هواره کړې ده.
په دې تړاو، د افغانستان د سوداګرۍ او پانګونې خونې مشر سید کریم هاشمي او د ازبکستان د سوداګرۍ خونې مشر دوران وهابوف، ازبکستان ته د بامیان د ۱۰۰ زره ټنه کچالو پر صادراتو هوکړې ته رسېدلي دي. د صادراتو د هوکړې د وروستي کولو چارې روانې دي.
په همدې حال کې، د کچالو لومړنۍ جوپه، چې اته لارۍ پکې شاملې دي، د حیرتان بندر له لارې د ازبکستان د ترمذ ښار پر لور روانه شوې ده.
د دواړو هېوادونو د سوداګرۍ خونو د بامیان د سیمهییزو چارواکو په همغږۍ، د سوداګرو او بزګرانو ترمنځ اړیکې ټینګې کړې او د کچالو د پېرلو، بازارموندنې او لېږد چارې یې همغږې کړې دي.
تمه ده چې دغه نوښت د بامیان د بزګرانو لپاره د بازار موندنې فرصتونه پراخ او د افغانستان او ازبکستان ترمنځ سوداګریزې اړیکې پیاوړې کړي.