تاند (یکشنبه، د لړم/ عقرب ۱۷ مه) د افغانستان او ازبکستان د خصوصي سکتور استازو په کابل کې د یوې غونډې په ترڅ کې د ۱۵۱ میلیون او ۱۶۰ زره ډالرو په ارزښت لسګونه سوداګریز قراردادونه لاسلیک کړي دي.
دا قراردادونه د دواړو هېوادونو د شاوخوا ۸۰ شرکتونو د استازو له خوا په بېلابېلو اقتصادي او تجارتي برخو کې لاسلیک شوي دي.
د افغانستان د سوداګرۍ او پانګونې خونې مرستیال مجیبالرحمن شیرزاد په دې غونډه کې د کابل او تاشکند ترمنځ د سوداګریزو او اقتصادي اړیکو پراختیا د دواړو هېوادونو لپاره مهمه بللې ده.
هغه ویلي چې په وروستیو میاشتو کې د دواړو هېوادونو د دولتي او خصوصي سکتورونو د پلاوو د تګ راتګ زیاتوالي د سوداګرو ترمنځ د مستقیمو اړیکو او همکارۍ زمینه برابره کړې ده.
په همدې حال کې، د ازبکستان د صادرونکو ټولنې مشر یرقین مالیکوف ویلي چې د دواړو هېوادونو ترمنځ سوداګري د پام وړ پراخه شوې ده.
د هغه په وینا، د افغانستان او ازبکستان ترمنځ دوهاړخیزه سوداګري چې پخوا شاوخوا ۸۰ میلیون ډالره وه، اوس له ۱.۸ میلیارد ډالرو اوښتې ده.
مالیکوف د سوداګرۍ دغه وده د دواړو هېوادونو د اړیکو له پیاوړتیا او د افغان او ازبک سوداګرو ترمنځ د متقابل باور له زیاتېدو سره تړلې بللې ده.
هغه زیاته کړې چې ازبک پانګهوال او سوداګر په افغانستان کې د پانګونې او ګډو شرکتونو د جوړولو فرصتونه ارزوي.
دا قراردادونو په داسې حال کې لاسلیک کېږي چې د کرنې او مالدارۍ وزارت د مرستیال په مشرۍ یو افغان پلاوی د شنبې په ورځ ازبکستان ته تللی دی. ټاکل شوې دا پلاوی له ازبک چارواکو سره په ځانګړي ډول د کرنې په برخه کې د دوهاړخیزې همکارۍ پر پراختیا خبرې وکړي.