تاند ( دوشنبه، د حوت ۲۸مه) راپورونه وایي چې نن سهار وختي د پاکستان هوایي ځواک ډیورنډ کرښې ته څېرمه د افغانستان پر یو شمېر سیمو هوایي بمبارۍ کړې دي.

د راپورونو له مخې، دا بمبارۍ د پکتیکا، خوست او کونړ ولایت په ځینو سیمو کې شوي چې یو شمېر ملکیانو ته پکې مرګ ژوبله اوښتې ده.

ویل شوي چې پکتیکا کې د پاکستاني طالبانو د یوه قومندان عبدالله شاه کور هم نښه شوی، خو هلته د احتمالي زیانونو په اړه څه نه دي ویل شوي.

په افغانستان کې د طالبانو واکمن رژیم په دې اړه کوم غبرګون نه دی ښودلی.

د افغانستان لپاره د پاکستان استازي اصف علي دراني اوړمه ورځ ادعا وکړه، چې په افغانستان کې د پاکستاني طالبانو یا ټي ټي پي تر ۷ زرو پورې جنګیالي موجود دي او هند مالي مرستې ورسره کوي.

پاکستان: کابل د ټي ټي پي د ۷ زرو وسله والو د پالنې پیسې له هنده اخلي – تاند (taand.net)

د دې ترڅنګ، د پاکستان د نوي حکومت د دفاع وزیر خواجه آصف هم ادعا وکړه چې  د پاکستان اکثره حملې له افغانستانه سرچینه اخلي

خواجه اصف ادعا کوي چې د پاکستان اکثره حملې له افغانستانه سرچینه اخلي – تاند (taand.net)

په کابل کې د طالبانو واکمن رژیم پرون یو ځل بیا ورته ادعاوې رد او بې اساسه وګڼلې.

په افغانستان کې د ټي ټي پي د پراخ حضور ادعا ته د کابل د واکمنو غبرګون – تاند (taand.net)

پاکستان تر دې مخکې هم په دې توجیې، چې ګواکې پاکستاني طالبان نښه کوي؛ پر افغانستان د طالبانو له اوسني رژیم له واکمنیدو وروسته څو ځلې هوایي بمبارۍ کړې دي.

طالب چارواکو د دغو بمباریو په اړه نرم غبرګون ښودلی و، چې د خلکو نیوکو سره مخ و.

تازه بمبارۍ په پاکستان کې د نوي حکومت له رامنځته کېدو سره شوي.

طالب رژیم، د پاکستان له اوسني حکومت سره د ښو اړیکو هیله لرله.