تاند (دوشنبه،د حوت ۲۸ مه) په افغانستان کې د طالبانو د واکمن رژیم ویاند ذبیح الله مجاهد په پکتیکا او خوست ولایتونو کې د پاکستان د هوایي بریدونو له امله د ۸ ښځو او ۳ ماشومانو د وژل کېدو خبر ورکړ.
نوموړي په یوه اعلامیه کې وویل، چې د پکتیکا په برمل ولسوالۍ کې د نن سهار بمبارۍ ۶ ښځې او ۳ ماشومان وژلي او د خوست په سپېره ولسوالۍ کې د بمبار له امله د یوه کور نړیدو ۲ نورې ښځې وژلې دي.
هغه دا بریدونه غندلي او د پاکستان حکومت ته یې د داسې بریدونو د ناوړه پایلو خبرداری و رکړی.
طالب ویاند د وژل شویو کسانو هویت نه دی په ډاګه کړی، خو ویلي چې د پاکستان هغه هدف یانې پاکستاني طالبان چې د نښه کولو لپاره یې پر افغان خاورې بریدونه شوي، په پاکستان کې دی.
ذبیح الله مجاهد دغه راز ویلي، چې د ډیورنډ کرښې دواړو غاړو ته د یوه قوم خلک مېشت او د دوی تر منځ راشه درشه عادي ده.
نوموړي د ورته بریدونو ترشا د څو جنرالانو د لاس لرلو ادعا کړې او د پاکستان له حکومته یې غوښتي چې د څو کسانو په خوله افغانستان سره اړیکې خرابې نه کړې.
بل لور ته: د پاکستان د طالبانو تحریک هم په یوه اعلامیه کې یاد شوي بریدونه غندلي دي.
پر افغان خاورې د پاکستان بمبارۍ او د ملکي مرګ ژوبلې خبرونه – تاند (taand.net)
د افغانستان لپاره د پاکستان استازي اصف علي دراني اوړمه ورځ ادعا وکړه، چې په افغانستان کې د پاکستاني طالبانو یا ټي ټي پي تر ۷ زرو پورې جنګیالي موجود دي او هند مالي مرستې ورسره کوي.
د دې ترڅنګ، د پاکستان د نوي حکومت د دفاع وزیر خواجه آصف هم ادعا وکړه چې د پاکستان اکثره حملې له افغانستانه سرچینه اخلي
پاکستان تر دې مخکې هم په دې توجیې، چې ګواکې پاکستاني طالبان نښه کوي؛ پر افغانستان د طالبانو له اوسني رژیم له واکمنیدو وروسته څو ځلې هوایي بمبارۍ کړې دي.
طالب چارواکو د دغو بمباریو په اړه نرم غبرګون ښودلی و، چې د خلکو نیوکو سره مخ و.
تازه بمبارۍ په پاکستان کې د نوي حکومت له رامنځته کېدو سره شوي.
طالب رژیم، د پاکستان له اوسني حکومت سره د ښو اړیکو هیله لرله.