تاند(پنجشنبه، د عقرب ۲۵ مه) د پاکستان د بهرنیو چارو وزارت ویاندې ممتاز زهرا بلوچ وایي چې دوی په کابل کې د طالبانو واکمن رژیم سره د پاکستاني طالبانو د هغو پټنځایونو معلومات شریک کړي، چې په وینا یې د افغانستان په خاوره کې دي.

هغې په یوه خبري ناسته کې دا غوښتنه هم وکړه، چې د طالبانو رژیم دې د دغو پټنځایونو پر ضد عملیات وکړي.

ممتاز بلوچ په دې تړاو نور جزییات وړاندې نه کړل.

تېره اوونۍ، د افغانستان لپاره د پاکستان ځانګړي استازي آصف علي دراني ادعا کړې وه چې په افغانستان کې تر شپږ زرو پورې پاکستاني طالبان پټ دي او د پاکستان خلاف وسله وال فعالیتونه کوي.

د طالبانو د رژیم ویاند ذبیج الله مجاهد دغه ادعا رد کړې او ویلي وو، چې پاکستان دې په دې اړه اسناد ورسره شریک کړي.

طالبانو د پاکستان د تازه ادعا په اړه غبرګون نه دی ښودلی.

مخکې طالب رژیم له پاکستاني طالبانو سره د پاکستان د حکومت د سولې پر مذاکراتو ټینګار کړی و او هم یې کابل کې د دغو مذاکراتو کوربه توب کړی و.

له دې سره، ویل کیږي چې د طالب رژیم ځینو کړیو په افغانستان کې د موجودو پاکستاني طالبانو په وژلو کې له پاکستان سره مرسته کړې ده.

پاکستان څو ځله د پاکستاني طالبانو د وژلو په ادعا، د افغانستان پر خاوره هوایي او توغندویي بریدونه وکړل، چې پر وړاندې یې د طالب رژیم کمزوری دریځ د افغانانو نیوکو سره مخ شو.