تاند (چهارشنبه، د جدي ۱۴ مه) د افغانستان د ریللارو ادارې ريیس بخت الرحمان شرافت د پاکستان د ریلوې له مرستیال ظفرزمان رانجا سره په کتنه کې د ټرانس افغان پروژې د سروې د پیلولو په اړه خبرې وکړې.
ترانس افغان هغه پروژه ده چې ازبکستان وړاندیز کړې او پر اساس یې د افغانستان د حیرتان – مزارشریف ریللار تر پېښوره پورې غځول کېږي.
ازبکستان دې پروژې ته ډېر لېوال دی.
د افغانستان د ریللار ادارې د خبرپاڼې له مخې، ښاغلیو شرافت او رانجا په خپلو خبرو کې د دې پروژې د سروې د پیلولو پر سر سلا وکړه.
دواړو خواوو همداراز وویل چې افغانستان او پاکستان به له ازبکستان سره په ګډه د ترانس افغان ریللارې د جوړېدو لپاره د سروې لګښت پرې کړي.
ټاکل شوې ده چې د ټرانس افغان په نوم د مزارشریف – پېښور ریللار په ۵ کلونو کې بشپړه شي او منځنۍ اسیا د افغانستان له لارې له جنوبي اسیا سره وصل کړي.
د چارو د کتونکو په وینا دا پروژه هغه مهال د ټولې سیمې په افتصاد کې لوی بدلون راوړلی شي چې پاکستان د هند او منځنۍ اسیا د سوداګرۍ په لاره کې خنډ نه شي.
هند چټک پرمختګ کوي. د دغه هیواد اقتصادي وده تر چین هم چټکه ده او ویل کېږي چې تر ۲۰۳۰ پورې به د نړۍ په درېیم افتصاد بدل شي. نو هر څومره چې هند وده کوي په هماغه اندازه یې د تیلو او ګازو په شمول اومو موادو ته اړتیا زیاتېږي چې منځنۍ اسیا او افغانستان یې لري.
د ترانس افغان ریللار، چې اوږدوالی یې ۷۶۰ کیلومتره دی، ۳۳ پُلونو او ۳ تمځایونوته اړتیا لري.
د دې پروژې لپاره ۴ میلیارده او ۸۰۰ میلیون ډالره بودجه پکار ده.