تاند ( شنبه، د جوزا ۸مه) د افغانستان د ملي امنیت سلاکار حمدالله محب، په رسنیو کې د ده په اړه خپور شوی وروستی راپور رد کړ.
نن سهار په رسنیو کې داسې راپورونه خپاره شول، چې په کې پاکستان افغان حکومت ته خبرداری ورکړی وو، چې نور د افغانستان د ملي امنیت سلاکار حمدالله محب سره د رسمي کړنو په هکله اړیکې نه ساتي.
تازه نن شنبه، ماسپښین ۳ بجې د ملي امنیت سلاکار حمدالله محب په کابل کې د امنیتي مسوولانو په خبري غونډه کې وویل، په رسنیو کې د ده په اړه خپور شوی هغه راپور حقیقت نه لري، چې ګني پاکستان ورسره اړیکه پرې کړې.
محب وایي، که پاکستان غواړي افغان سوله کې مثبت رول ولوبوي، د طالبانو او نورو غیر رسمي وسله والو ډلو له ملاتړ نه دې لاس واخلي.
هغه په خپلو خبرو کې زیاته کړه : « د چا په کورنیو چارو کې لاسوهنه نه کوو، نورو ته هم اجازه نه ورکوو چې زموږ په کورنیو چارو کې لاسوهنه وکړي».
د یادولو ده ، چې محب د تېر کوچني اختر په اوله ورځ ننګرهار ته د سفر پر مهال په پاکستان توندې نیوکې وکړې او يوې لويې غونډې ته د خبرو پر مهال پر پاکستان سختې نیوکې وکړې او ډېرې داسې ستوغې خبرې يې وکړې، چې پاکستان يې د ځان په هکله له چا د اورېدو تمه نه درلوده.
نوموړي هغه مهال پاکستان ته په خطاب کې وویل، چې تاریخ یې جعلي او له وسله والو طالبانو ملاتړ کوي، خو د ویاړ لپاره دومره څه نه لري، چې خپلې سیمې او وسلې پرې ونوموي.
پاکستان: نور له حمدالله محب سره د رسمي کړنو په هکله اړیکې نه پالو