تاند (پنجشبنه د حوت ۱۴) ولسمشر اشرف غني یو ځل بیا ټینګار کړی چې سوله یې لومړیتوب ده او د څلوېښت کلنې جګړې د پای ته رسولو غوښتونکی دی.
ښاغلي غني پرون چهارشنبه د کابینې په غونډه کې د یو شمېر نورو مسایلو تر څنګ د سولې پر روان بهیر هم خبرې وکړې.
د ارګ په یوه خبرپاڼه کې راغلي چې ولسمشر په دې ناسته کې وویل، سوله د افغانانو لومړیتوب دی او دوی پوره څلوېښت کاله له خپل دغه مسلم حق محروم ساتل شوي دي.
سرچینه وايي، نوموړي د کابینې له غړیو او والیانو وغوښتل چې د سولې لپاره هڅې وکړي او له ولس سره اړیکې نژدې کړي.
د ولسمشر غني په خبره څومره چې د حکومت چارې پیاوړې کېږي، شفافیت رامنځ ته کېږي او د ولس او حکومت ترمنځ اړیکې پیاوړې کېږي چې په دې سره د سولې د راتګ احتمال ډېرېږي.
په خبرپاڼه کې دا هم راغلي چې ولسمشر اشرف غني د سولې په برخه کې د نړیوالو له همکاریو هم مننه وکړه او د افغان سولې په تړاو یې د روسیې وروستی دریځ هم وستایه.
نوموړي په خپلو خبرو کې وویل چې د سولې په برخه کې د روسیې همکاري اړینه ده.
باید وویل شي چې څو ورځې وړاندې د روسیې د بهرنیو چارو وزیر سرګي لاوروف د افغانستان د بهرنیو چارو له حنیف اتمر سره په یوه ګډ کنفرانس کې د افغانستان پر وضعیت څرګندونې وکړې.
سرګي لاوروف د دوحې د سولې په بهیر نیوکه وکړه او د افغانانو تر منځ د سولې خبرو د بریا لپاره یې د مسکو د بهیر د بیا پیل وړاندیز وکړ.
روسیه:د افغانانو ترمنځ د سولې خبرو د بل پړاو کوربه توب ته چمتو یو