تاند (یکشنبه، د لړم/ عقرب ۲۴ مه) د ډیلي پولیسو ویلي، د هند د هوايي ځواک یوه جګپوړي افسر د لوڅو عکسونو په بدل کې د دغه هېواد محرمانه پوځي معلومات د پاکستان د استخباراتي ادارې له یوه غړي سره شریک کړي دي.
د پولیسو په وینا، دغه افسر وړاندیز کړی و چې د هند د هوايي ځواک د جګړې د محرمانه پلانونو پاڼې به د هغو عکسونو په بدل کې ورکړي چې مقابل لوري به ورته لېږلي. پولیس ادعا کوي چې افسر د یوه لوڅ عکس له ترلاسه کولو وروسته د جګړې د محرمانه پلان یوه پاڼه ورلېږلې وه. هغه همداراز وړاندیز کړی و چې د هر ترلاسه شوي تصویر په بدل کې به د اسنادو یوه پاڼه ورسره شریکوي.
د تورونو له مخې، دغه افسر د ۲۰۲۶ کال د جنورۍ له ۱۲مې د اپرېل تر لومړۍ نېټې پورې د واټساپ له لارې له یاد کس سره په اړیکه کې و او د هند د پوځي وړتیاوو او چمتووالي په اړه یې حساس معلومات ورسره شریک کړي دي.
نوموړی له پنځو میاشتو راهیسې د رسمي رازونو د قانون له مخې په یوه ثبت شوې قضیه کې بندي دی. پولیس وايي، هغه د اپرېل په لومړۍ نېټه وروسته له هغې ودرول شو او تلاشي یې وشوه چې ادعا کېږي خپل دفتر ته یې یو ځیرک ټیلیفون وړی و.
د بېپیلوټه الوتکو او جنګي الوتکو په اړه معلومات افشا شوي
د پولیسو په تورپاڼه کې د هغو محرمو معلوماتو بېلابېلې برخې یادې شوې چې ګواکې دغه افسر د پاکستان استخباراتي کس ته سپارلې دي.
په دغو معلوماتو کې د هند د هوايي ځواک د یوې پټې بېپیلوټه الوتکو په اړه جزئیات شامل وو؛ لکه د کارکوونکو شمېر، اداري جوړښت او د عملیاتو کړنلارې. پولیس وايي، د بېپیلوټه الوتکو د ازموینو، د الوتنې د مودې، د وسلو د نښهویشتنې د سیستمونو او عملیاتي وړتیاوو په اړه معلومات هم شریک شوي دي.
د تورونو له مخې، افسر د هغو سیمو احتمالي ځایونه هم افشا کړي چې ښايي د جګړې پر مهال دغه بېپیلوټه الوتکې پکې ځای پر ځای شي. څېړونکي وايي، دا ډول معلومات د هند له یوه سیال هیواد سره د هند د پوځي چمتووالي په اړه په پوهېدو کې مرسته کولی شي.
نوموړي د لیه په سیمه کې د جنګي الوتکو د ځای پر ځای کېدو او د راجستان ایالت په سورتګر سیمه کې د مهراجان په پوځي ډګر کې د ترسره شوو پوځي تمرینونو په اړه هم معلومات ورکړي دي.
د تورپاڼې له مخې، د حساسو پوځي تاسیساتو د ځایونو او د جګړې پر مهال د سرتېرو د ځای پر ځای کېدو جزئیات هم په افشا شویو معلوماتو کې شامل وو. پولیسو خبرداری ورکړی چې د دې ډول معلوماتو افشا کېدل پوځي عملیات او دفاعي تاسیسات له خطر سره مخامخولی شي.
د پنځو افسرانو په ټیلیفونونو کې د جاسوسي سافټویر د نصبولو هڅه
څېړونکي ادعا کوي چې تورن افسر له پاکستاني استخباراتي کس سره مرسته کړې، څو د هند د هوايي ځواک د نورو کارکوونکو په برېښنايي وسایلو کې زېرمه شویو معلوماتو ته هم لاسرسی ومومي.
د تورپاڼې له مخې، یاد کس هندي افسر ته ځینې اپلېکېشنونه او وېبتړوني لېږلي وو چې ګواکې ناوړه پروګرامونه یا جاسوسي سافټویر پکې ځای پر ځای شوي وو. دغه پروګرامونه په احتمالي توګه د ځیرکو ټیلیفونونو او نورو برېښنايي وسایلو محرمو معلوماتو ته د لاسرسي لپاره کارېدلی شي.
پولیس ادعا کوي چې افسر د پنځو نورو پوځي افسرانو، چې د ده تر قوماندې لاندې و، پر وسایلو د ځانګړو جاسوسي پروګرامونو په نصبولو کې مرسته کړې ده.
څېړونکي شک لري چې د دې کار موخه د دغو افسرانو د حساسو معلوماتو، په ځانګړي ډول له خپلو جګپوړو چارواکو سره د هغوی د اړیکو او خبرو اترو، ترلاسه کول وو.
دا تورونه ښيي چې ګواکې دغه افسر نه یوازې خپل پوځي معلومات شریک کړي، بلکې هڅه یې کړې چې د نورو پوځي کارکوونکو معلوماتو ته هم لاسرسی ومومي.
د واټساپ زرګونه پیغامونه د شواهدو په توګه وړاندې شوي
د ډیلي پولیسو په تورپاڼه کې له پاکستاني استخباراتي کس سره د افسر د اړیکو برېښنايي شواهد هم شامل کړي دي.
د څېړنو له مخې، د افسر د واټساپ د معلوماتو په ارزونه کې د دواړو ترمنځ ۳۰۰۸ لیکلي پیغامونه، ۶۵ عکسونه، ۶۵ غبرګونونه، ۴۲ غږیزې اړیکې، څلور ویډیويي اړیکې او شپږ وېبتړوني موندل شوي دي.
پولیس دغه معلومات څېړي، څو د احتمالي جاسوسۍ په عملیاتو کې د محرمو معلوماتو د افشا کېدو کچه معلومه او دا روښانه کړي چې ایا په دې قضیه کې نور کسان هم لاس لري که نه.