تاند( یکشنبه، د سرطان ۲۹) ملګري ملتونه وایي په یوه وخت کې له ګڼو جنجالونو او کشمکشونو سره لاس او ګرېوان دي.
د ملګرو ملتونو عمومي منشي انتونیو ګوتریش په لندن کې د یوې غونډې پر مهال ویلي، چې د نړۍ ځواکمن هېوادونه د ملګرو ملتونو له نړیوال سازمان سره مرسته نه کوي.
ګوتریش زیاته کړې، چې تر ډیره ځواکمنو هیوادونو له کرونا سره د مبارزې په دې حساسو شرایطو کې په خپلو کې په ناندریو بوخت دي.
د نوموړي په خبره کرونا د دې لامل شوه، چې د ځواکمنو هېوادونو ترمنځ د همکارۍ او اړیکو اصلي کمیت او کیفیت نړیوالو ته روښانه کړي.
د ملګرو ملتونو عمومي منشي انتونیو ګوتریش ویلي د دې وخت دی، چې د هېوادونو ترمنځ د اړیکو او اصولو پر نوې تګلاره کار وشي.
هغه په ټینګار سره زیاته کړې،چې ځواکمن هېوادونه باید په دې پوه شي، چې اوسنی کشمکش او تقابل نړیوالو ته د منلو نه دی.
نوموړی داسې مهال دا څرګندونې کوي، چې د نړۍ ځواکمن هیوادونو په خپلو کې سره نښتي دي.