تاند (چهارشنبه د چنګاښ/سرطان ۲۵مه) د یوې نوې سروې له مخې، په هرو اتو امریکايي کارکوونکو کې یوه کس ویلي چې خپله عاطفي اړیکه یې د لېنکډاين له لارې پیل کړې ده.
دا بهیر په داسې حال کې مخ پر زیاتېدو دی چې د جعلي حسابونو، درغلیو او د کاروونکو د ستړیا له امله پر دودیزو اپلېکېشنونو د خلکو باور کم شوی دی.
لېنکډاين، چې تر ډېره د مسلکي اړیکو جوړولو او د دندو موندلو لپاره پېژندل کېږي اوس د عاطفي اړیکو د پېژندنې لپاره هم کارول کېږي.
د دودیزو پېژندګلوۍ سافټویرونو برعکس، د لېنکډاين پروفایلونه د کاروونکو اصلي نوم، د کار ځای، زدهکړې او مسلکي اړیکې ښيي، چې له امله یې خلک دغه معلومات ډېر د باور وړ ګڼي.
سروې ښيي چې نږدې نیمايي ګډونوالو د لېنکډاين پروفایلونه د پېژندګلوۍ له اپونو څخه ډېر باوري بللي دي.
همدارنګه، په هرو پنځو کسانو کې یوه ویلي چې د خپل خوښې وړ کس د لا ډېرو معلوماتو ترلاسه کولو لپاره یې لېنکډاين کارولی دی. سره له دې، ډېری کاروونکي لا هم له دې بهیر سره موافق نه دي.
نږدې دوه پر درېیمه برخه ګډونوال باور لري چې په لېنکډاين کې عاطفي اړیکې ښايي د دوی پر مسلکي اړیکو منفي اغېز وکړي او درې پر څلورمه برخه وایي چې دا پلاتفورم باید یوازې پر سوداګرۍ او مسلکي فعالیتونو متمرکز پاتې شي.
کارپوهان وایي، د لېنکډاين د کارونې بڼه بدلېدونکې ده، خو که څه هم دا پلاتفورم د خلکو د هویت د روڼتیا له امله د باور وړ ګڼل کېږي، بیا هم د شخصي او مسلکي اړیکو ګډول د کاري چاپېریال او مسلکي اعتبار لپاره ستونزې رامنځته کولای شي.