تاند (یکشنبه، د وږي/ سنبلې ۸ مه) د جرمني حکومت د طالبانو د حکومت یوه بل پلاوي ته بلنه ورکړې چې دغه هیواد ته ورشي او په دې ورسره خبرې وکړي چې څنګه افغانستان ته د افغان اتباعو د بېرته ستنولو او اخراج بهیر اسانولی شي.
د جرمني د بهرنیو چارو وزارت ویلي، پلاوی به د هغو کسانو لپاره لازم اسناد چمتو کړي چې د طالبانو له خوا د بېرته ستنېدو لپاره د منلو وړ وي. وزارت زیاته کړې چې افغانستان ته د اخراجونو د شمېر د زیاتولو لپاره د کافي کارکوونکو او تخنیکي ظرفیت برابرول ضروري دي.
جرمني له طالبانو سره رسمي ډیپلوماټیکې اړیکې نه لري، خو د اخراجونو په تړاو یې مخکې هم د طالبانو ځینو استازو ته اجازه ورکړې چې جرمني ته سفر وکړي او له افغان ډیپلوماتیکو استازولیو سره کار وکړي.
د جرمني د اوسني حکومت له واک ته رسېدو راوروسته ۲۲۸ کسان افغانستان ته ایستل شوي چې ډېری یې د جرمونو له امله محکوم شوي وو. وروستي کسان د اګست په ۲۵مه افغانستان ته واستول شول چې په لړ کې یې ۲۳ کسان له لایپزیګ-هاله هوايي ډګر څخه افغانستان ته ولېږدول شول.
د راپورونو له مخې، تېر کال هم د طالبانو دوه قونسلي چارواکي جرمني ته تللي وو؛ یو یې اوس په برلین کې د افغانستان د سفارت چارې پر مخ وړي او بل د بن قونسلګرۍ مسوولیت لري.
د جرمني این ډي ار رسنۍ پرون (شنبې) د خپل هیواد د بهرنیو چارو وزارت په قول وویل، د پلاوي سفر افغانستان ته د نورو افغانانو د ایستلو د چمتووالي له بهیر سره مستقیم تړاو لري. د راپورونو له مخې، پلاوی د قطر له لارې جرمني ته تللی او د ۳۰ ورځو ویزه لري.
پلاوی به په برلین، بن او مونشن کې د افغانستان له سفارت او قونسلګریو سره د اړوندو ترتیباتو په برخه کې کار وکړي. طالبانو تر اوسه د دې سفر په اړه رسماَ څه نه دي ویلي.
این ډي آر ویلي چې د طالبانو پلاوی حاضردمه په برلین کې د افغانستان په سفارت کې اوسي.
د دغه هیواد د باندنیو چارو وزارت ویاند فرانسپرس اژانس ته ویلي له تېر کال راهیسې چې په جرمني کې نوي حکومت په کار پیل کړی، ۲۲۸ افغانان بېرته افغانستان ته استول شوي دي.