تاند (یکشنبه، دوږي/ سنبلې ۸ مه) د بشري حقونو د ایراني سازمانونو د راپورونو له مخې، په ایران کې د ۲۰۲۶ کال له پیل راهیسې لږ تر لږه ۲۰ افغان اتباع په زندانونو کې اعدام شوي دي. د راپورونو له مخې، هره میاشت لږ تر لږه یو افغان اعدام شوی او درې نور افغانان د اعدام په سزا محکوم شوي دي.
پر اعدام شویو کسانو د نشهیي توکو اړوند جرمونو، قتل، د اسرائیل لپاره د جاسوسۍ او په حکومت ضد اعتراضونو کې د ګډون تورونه لګول شوي دي.
د بشري حقونو سازمانونو د دغو قضیو په اړه د عادلانه محاکمې، وکیل ته د لاسرسي او د کورنیو د خبرولو په برخه کې اندېښنې څرګندې کړې دي. د دوی په وینا، په ایران کې یو شمېر اعدامونه له رسمي اعلان پرته ترسره کېږي، چې له امله یې د اعدام شویو افغانانو د کره شمېر معلومول ستونزمن دي.
په وروستیو قضیو کې د ګل محمد محمدي او قائم حسینې په نوم دوه افغانان، چې په خپل منځ کې د تره زامن وو، په اصفهان کې د یوې قضیې له امله د اعدام په سزا محکوم شوي دي.
همداراز افشار شاهاحمدي، ایمان شفاعي او صدرالدین احمدزاده هم د پولیسو د یوه مرکز د سوځولو په تور د اعدام په سزا محکوم شوي دي.
د «هنګاو» په وینا، یوازې په ۲۰۲۵ کال کې لږ تر لږه ۸۵ افغان اتباع په ایران کې اعدام شوي وو.