تاند (شنبه، د غويي/ ثور ۲۶ مه) د روسیې د صدراعظم مرستيال الکسي اوورچوک، ويلي چې د طالبانو ادارې له مسکو غوښتي چې د افغان محصلانو د روزنې لپاره طبي استادان افغانستان ته واستوي. هغه زياته کړه چې دواړو لورو د جمعې په ورځ په کازان ښار کې د «روسيه ـ اسلامي نړۍ» د غونډې په څنډه کې د دوه اړخيزو همکاريو په اړه خبرې وکړې.
اوورچوک وويل چې له طالب پلاوي سره په خبرو کې د سون توکو، کرنې، پانګونې او همداراز د روسيې د طبابت په برخه کې د «ډېرې لېوالتيا» موضوعات مطرح شول. د هغه په وينا، طالبانو غوښتنه کړې چې داسې استادان واستول شي چې د طبي څانګو په برخه کې افغان محصلانو ته زده کړې ورکړي.
د روسيې د تاس خبري اژانس د راپور له مخې، اوورچوک د طالبانو د لوړو زده کړو له وزير ندامحمد نديم سره په کتنه کې د سوداګريزو او اقتصادي همکاريو د پراختيا، د ګمرکي او صحي ـ وترنري چارو او د افغانستان د ترانزيټي ظرفيت د کارولو په اړه خبرې وکړې.
اوورچوک وويل چې طالبان د روسي موټرو او کرنيزو محصولاتو واردولو ته لېوالتيا لري او ترڅنګ يې د پانګونې او د سون توکو د صادراتو د دوام په اړه هم بحث شوی دی. هغه زياته کړه چې د دواړو لورو ترمنځ ديپلوماتيکې اړيکې موجودې دي او منظمې اړيکې د اړوندو ادارو ترمنځ روانې دي.
د روسيې د صدراعظم مرستيال د دواړو خواوو ترمنځ د سوداګرۍ د پراختيا ظرفيت «ستر» وباله، خو اوسنی حجم يې «ټيټ» ياد کړ. د روسيې د شمېرو له مخې، د دواړو لورو سوداګري شاوخوا ۳۲۶ ميليون ډالره ده، خو د طالبانو د شمېرو له مخې نژدې ۵۰۰ ميليون ډالرو ته رسېږي. هغه وويل چې د روان کال په لومړيو دوو مياشتو کې د متقابلې سوداګرۍ کچه ۲٫۶ برابره زياته شوې ده.
د «روسيه ـ اسلامي نړۍ» اوولسم اقتصادي فورم د غويي له ۲۲مې تر ۲۷مې نېټې پورې په کازان ښار کې روان دی او د طالبانو يو پلاوی هم پکې ګډون لري.
ملاندیم په کازان کې له نړیوالو شرکتونو او پانګوالو وغوښتل چې د افغانستان د لوړو زده کړو په سکیتور کې پانګونه وکړي.
ندیم دا غوښتنه د کازان د غونډې په څنګ کې د څو نړیوالو شرکتونو له استازو سره په کتنه کې وکړه.