تاند ( سه شنبه د کب – حوت ۵مه ) ننګرهار کې خصوصي ښوونځیو راستنو شوو کډوالو ته د وړیا زده کړو هوکړه لاسلیک کړه.
دغه هوکړه ننګرهار کې د طالبانو د والي غلام الرحمن حیدري او د خصوصي ښوونځیو د اتحادیو د مسؤل عاشق الله نجیبي ترمنځ لاسلیک شوه.
د ولایت د خبرپاڼې له مخې به خصوصي ښوونځي په دې ولایت کې دوه زره او ۴۲۰ راستنو شوو زده کوونکو ته د وړیا زده کړو زمینه برابروي او هر ښوونځی به د ژمنې سره سم منلی تعداد جزبوي.
خبرپاڼه کې راغلي چې، د دغي هوکړي ارزښت یو نیم میلیون افغانۍ دی او پر اساس به یې یاد شمېر راستنو شوو ته د دغه ولایت په ۳۸۴ خصوصي ښوونځیو کي د وړیا زده کړو زمینه برابرېږي.
د سرچینې په وینا دغه هوکړه د لسو میاشتو لپاره اعتبار لري.
دغه هوکړه په داسې مهال کېږي چې، هره ورځ په زرګونه افغان کډوال هېواد ته راستنېږي او د مالوماتو پر اساس راستانه شوي کډوال له سختو اقتصادي ستونزو سره مخ دي.
خو راغلي کډوال بیا له طالبانو غوښتنه کوي چې، د زامنو ترڅنګ یې لوڼو ته هم د زده کړو زمینه برابره او د دوی پرمخ تړلې دروازې پرانېزي، هغه چې تر نا معلوم امرثاني تړل شوې دي.