تاند (یکشنبه، د سلواغې/ دلوې ۱۲مه) تويوتا موټر شرکت يو ځل بيا د موټرو په نړيوال صنعت کې خپله برلاسي ثابته کړه او په ۲۰۲۵ کال کې يې د ۱۱ میلیونه او ۳۰۰ زره (۱۱.۳ مېلیونه) موټرونه پلورلي چې یو ریکارډ دی.
په دې توګه دا پرلهپسې شپږم کال دی چې تویوتا تر ټولو ډېر موټرونه پلوري او د فولکس وګون ګروپ په ګډون يې پر نورو سيالانو خپل برلاسی وساته۔
د تویوتا په مجموعي خرڅلاو کې د اصلي ماډلونو او برانډونو تویوتا او لېکسس ترڅنګ د هغې خویندې کمپنۍ ډایهاټسو او هينو موټرونه هم شامل دي. د ډلې خرڅلاو د تېر کال پرتله شاوخوا ۴.۶ سلنه زيات شوی، او په امريکا او جاپان کې یې، چې مهم بازارونه بلل کېږي، پياوړې پايلې ترلاسه شوې دي۔
هايبريډ موټرونه د تویوتا د ودې مهمه برخه پاتې شوې او په نړيوال خرڅلاو کې يې د پام وړ رول لرلی دی.
د تویوتا د SUV ماډلونو، په ځانګړي ډول د RAV4 ماډل، له جاپان څخه امريکا ته صادرات د پام وړ زیات شوي دي. بل لور ته، په چين کې د سختې سيالۍ له امله په خرڅلاو کې يوازې لږ زياتوالی لیدل شوی دی۔
د بېټرۍ پر برېښنا چلېدونکو موټرونو (BEVs) خرڅلاو د هایبريډ موټرونو پرتله محدود پاتې شوی، چې دا د تویوتا د اوسنۍ تګلارې او د محصولاتو د امتزاج څرګندونه کوي.
د دې دلیل ښايي دا وي چې د تویوتا تر ټولو په لوی بازار یعني امریکا کې واټنونه زیات دي او برېښنايي موټرو ته خلک ډیره لېوالتیا نه ښيي.
چېري چې تویوتا د پام وړ پرمختګ کړی، هلته يو شمېر نړيوال سيالان له ستونزو سره مخامخ شوي دي۔ د فولکس واګون ګروپ نړيوال خرڅلاو، په ځانګړي ډول په چين او نورو بازارونو کې د فشار له امله، لږ کموالی ښودلی دی۔ نور جاپاني برانډونه لکه سوزوکي په ۲۰۲۵ کال کې د يادونې وړ پرمختګ کړی او په نړيواله درجه بندۍ کې يې نيسان غوندې پخواني برانډونه شاته پرې ايښي دي۔
د تویوتا د ۲۰۲۵ کال پايلې د دې شرکت دوامداره برلاسی او د هایبريډ ټکنالوژۍ پياوړتيا په ډاګه کوي۔ خو د نړيوالې تقاضا بدلون او د برېښنايي موټرونو پر لور د زياتېدونکي تمايل په رڼا کې به، په راتلونکې کې پرمختګ پر نويو محصولاتو، ټکنالوژۍ او سيمهييزو تګلارو ولاړ وي۔