روسیې تېره شپه د توغندیو او ډرونونو له لارې د اوکراین پلازمېنه کیف بمبارد کړې، چې له امله یې لږ تر لږه ۸ تنه وژل شوي او تر ۷۰ زیات ټپیان شوي دي.
د چارواکو په وینا، برید د اور لګېدنې سبب شوی او ۶ ماشومان هم په ټپیانو کې شامل دي.
د کیف ښاروال، ویتالي کلیچکو، د تلفاتو شمېر تایید کړی او ویلي یې دي چې تر ټولو جدي زیان د ښار لویدیځ ته په سویتوشینسکي ولسوالۍ کې رامنځته شوی، چیرې چې ژغورونکي لا هم د کنډوالو پاکولو او د احتمالي ژوندي کسانو د موندلو هڅه کوي.
په ټولنیزو شبکو خپاره شوي انځورونه ښيي چې ژغورونکي د شپې لخوا د پروژکټورونو په رڼا کې کار کوي، د زینو په مرسته ودانیو ته پورته کیږې او په اپارتمانونو کې د خلکو وضعیت څېړي.
د اوکراین د بهرنیو چارو وزیر، اندريي سیبیها، دا بریدونه «وحشیانه» بللي او ویلي یې دي چې روسیه د سولې پر وړاندې اصلي خنډ دی.
تر دې دمه روسیې د برید په اړه رسمي څرګندونې نه دي کړې.