تاند (شنبه، د تلې/ میزان ۲۴ مه) د بندونو د درد او پړسوب ناروغۍ، چې روماتېډ ارترایټس (Rheumatoid Arthritis) بلل کېږي، په اړه یوې نوې نړیوالې څېړنې اندېښمنوونکې پایلې خپرې کړې دي.
طبي متخصصان وايي چې د روماتېډ ارترایټس زرګونه ناروغان د سږو په یوې پټې او خطرناکې ناروغۍ، RA-ILD (Rheumatoid Arthritis-Associated Interstitial Lung Disease) اخته کېږي، چې سږو ته جدي زیان رسوي.
د The Lancet Respiratory Medicine په طبي مجله کې د خپرې شوې څېړنې له مخې، روماتېډ ارترایټس یوازې بندونه نه اغېزمنوي، بلکې د سږو په داخلي نسجونو کې هم شدید التهاب او زخمونه رامنځته کوي، چې له امله یې تنفس کول ډېر ستونزمن کېږي.
څېړنه ښيي چې د روماتېډ ارترایټس له هرو شپږو ناروغانو څخه یو تن په سږو کې غیرعادي بدلونونه تجربه کوي، او له هرو لسو ناروغانو څخه یو تن په رسمي ډول د سږو د دې خطرناکې ناروغۍ ښکار کېږي.
متخصصان ټینګار کوي چې که ناروغي په وخت تشخیص شي، درمل کولی شي د سږو د خرابېدو او ناکاره کېدو مخه ونیسي. خو که تشخیص او درملنه وځنډېږي، دا ناروغي د ژوند لپاره جدي ګواښ ګرځېدای شي.
د دې ناروغۍ مهمې نښې نښانې دا دي:
- دوامداره وچ ټوخی پرته له څرګند علت څخه؛
- د لږ فزیکي فعالیت یا مزل پر مهال د ساه لنډېدل؛
- شدیده ستړیا او د بدن کمزوري؛
- او په ځینو مواردو کې د غږ کیناستل یا بدلون.
روغتیايي متخصصان سپارښتنه کوي چې د روماتېډ ارترایټس ناروغان باید د دغو نښو له څرګندېدو سره ژر تر ژره له ډاکتر سره مشوره وکړي، ځکه وختي تشخیص د ناروغۍ د کنټرول او د سږو د جدي زیان د مخنیوي لپاره خورا مهم دی.
یادونه: دا معلومات یوازې د عامه پوهاوي لپاره دي. د روغتیا اړوند پرېکړو لپاره تل د خپل ډاکتر یا روغتیايي متخصص مشوره اخلئ.