تاند (یکشنبه، د سلواغې/ دلوې ۲۸ مه) د خیبر پښتونخوا د اعلي وزیر سلاکار، بارسټر محمد علي سیف، د یکشنبې په ورځ وویل چې د دې ایالت حکومت به دوه پلاوي افغانستان ته واستوي چې له کابل سره خبرې وکړي.
د محمدعلي سیف په وینا دا پلاوي د دې لپاره کابل ته استول کېږي چې د خبرو اترو لپاره مناسب چاپېریال رامنځته کړي او ډیپلوماټیکې چارې تنظیم کړي.
دا پرمختګ په داسې وخت کې شوی، چې په پاکستان کې د ترهګرۍ پیښې زیاتې شوي او اسلامآباد تل د دې بریدونو پړه پر هغو ناقانونه ډلو اچولې، چې د پاکستاني چارواکو په ادعا په افغانستان کې فعالې دي—خو د افغان طالبانو حکومت دا ادعاوې په کلکه رد کړي دي.
تر دې وړاندې د خیبرپښتونخوا ایالتي حکومت له خپل مرکزي حکومته غوښتنه کړې وه چې دوی ته اجازه ورکړي چې کابل ته جرګه واستوي څو د طالبانو له حکومت سره مخامخ خبرې وکړي خو د پاکستان د مرکزي حکومت ځینو چارواکو دا وړاندیز رد کړ ا ویې ویل چې ایالتي حکومتونه له بهرنیو هیوادونو سره د تماس او خبرو حق نه لري.