تاند – یوه نوې څېړنه، چې چینایي څېړونکو کړې ده، ښيي چې په پلاستيکي لوښو کې خواړه خوړل د زړه د ناکامۍ خطر په ښکاره ډول زیاتوي.
د خطر اصلي لامل
څېړونکي وايي، د دې خطر د زیاتوالي دلیل د هاضمې په سیستم کې د میکروبونو بدلون دی، چې التهاب رامنځته کوي او د وینې جریان ته زیان رسوي.
د څېړنې پایلې
دې څېړنې، چې په دوو برخو کې شوې او دقیقه علمي ارزونه یې شوې، د هغو شواهدو شمیر ډېر کړی، چې په پلاستيکي لوښو کې د خوراک د احتمالي خطرونو په اړه مخ په زیاتېدو دي.
ساینسپوهانو لا دمخه خبرداری ورکړی و چې د پلاستيکي موادو کیمیاوي ترکیبونه د زړه دله ناروغیو سره تړاو لري.
څېړنه څنګه ترسره شوه؟
- څېړونکو لومړی د ۳۰۰۰ کسانو د پلاستيکي لوښو د کارولو کچه وڅېړله او د زړه په ناروغۍ د هغوی د اخته کېدو امکان یې وارزاوه.
- په بله مرحله کې، په پلاستيکي بوتلونو کې اېشل شوې اوبه، چې د پلاستیک کیمیاوي مواد یې جذب کړي وو، په موږکانو ړازمول شوې.
خطرناکې پایلې
لاسته راغلي معلومات ښيي، چې د پلاستیک کیمیاوي مواد د زړه د ناکامۍ خطر په ښکاره ډول زیاتوي.
پلاستیک شاوخوا ۲۰ زره کیمیاوي مواد لري، چې زیاته برخه یې د روغتیا لپاره خطرناکه ده.
دا مواد اکثراً د خوراکي توکو په بستهبندۍ کې موندل کېږي او له سرطان، د تولیدي سیستم زیان، او نورو روغتیايي ستونزو سره تړاو لري.
د ګرمو توکو او پلاستیک ترمنځ خطرناک تعامل
څېړونکو خبرداری ورکړی، چې کله پلاستیک له ګرمو موادو سره تماس ومومي، کیمیاوي مواد یې په چټکۍ او لوړه کچه خارجېږي.
د دې څېړنې پر اساس، که پلاستيکي لوښي په مایکرووېف کې تودو شي، هر سانتيمتر مربع یې تر ۴.۲ میلیونه مایکروپلاستیک ذرات خوشې کوي.
د روغتیايي متخصصانو سپارښتنې
که څه هم دا څېړنه د مصرف کوونکو د ساتنې لپاره مشخصې سپارښتنې نه لري، خو روغتیايي متخصصان وايي:
- په کور کې په پلاستيکي لوښو کې باید خواړه تاوده نه کړل شي.
- په پلاستیک کې باید تود خواړه وا نه چول شي، او نه هم باید پکې پخلی وشي.
- د کورنيو پلاستيکي لوښو بدیلونه لکه ښیښه، لرګي، یا فولاد کارول باید ډېر شي.
پلاستیک د انسان مغز ته رسېدلی!
یوه بله نوې څېړنه ښيي، چې د مایکروپلاستیک ذرات د انسان مغز ته هم داخل شوي!
د ۲۰۱۶ او ۲۰۲۴ کلونو ترمنځ د مړو د مغز د نمونو ارزونې ښودلې، چې د پلاستیک ذرات ۵۰ سلنه زیات شوي دي.