تاند (یکشنبه، د وري/ حمل ۳۱ مه) د افغانستان د هوا پېژندنې ریاست د نن لپاره د هیواد په یوولس ولایتونو کې د بارانونو او سیلونو اټکل کړی دی.
د دې ریاست د اټکل له مخې، نن به په کندوز، بدخشان، تخار، بغلان، کونړ، کاپیسا، پنجشېر، پکتیا، لوګر، پروان او لغمان ولایتونو کې ورښتونه پیل شي او د ثور تر دوهمې پورې به دوام وکړي.
د هوا پېژندنې ادارې د یادو ۱۱ ولایتونو له اوسیدونکو غوښتي چې د سرومال د تاوانونو د مخنیوي لپاره تیاري ونیسي او هغو سیمو ته له تګه ډډه وکړي چې سیندونه ورته نژدې دي.
افغانستان د نړۍ یو له هغو څو ګوته په شمېر هیوادونو څخه دی چې اقلیمي بدلون سخت ځپلی دی.
له تېر کال راهیسي سیلونه د افغانستان یو شمېر سیمې پر له پسې ځپي. دغو سیلونو د سلګونو افغانانو ژوند اخیستی او ډېر مالي تاوانونه یې هم اړولي دي.