تاند ( پنج شنبه د میزان ۱۹مه) د پښتون ژغورنې غورځنګ مشر منظور پښتین وایي، د نړۍ هیڅ ځواک نهشي کولای چې د دوی د جرګې مخه ونیسي.
ټاکل شوې دا جرګه سبا جمعه د اکتوبر په ۱۱مه نېټه پيل شي.
پښتین تېره شپه خپلو پلویانو ته په وینا کې ویلي، چې د پاکستان حکومت د ګډونوالو په وړاندې لارې بندې کړي او خنډونه یې جوړ کړي څو د خلکو مخه ونیسي، خو په خبره یې دوی تنظمیات بشپړ کړي او په هر حالت کې به دا جرګه ترسره کړي.
دا څرګندونې داسې مهال کوي چې پرون چهارشنبه د خیبر درې په ریګي للمه سیمه کې د جرګې په تنظیموونکو د پاکستاني پولیسو په ډزو کې ۳ تنه ووژل شول او ۱۲ نور ټپيان شول.
دغه جرګه چې شاوخوا ۳۰ زره کسان وربلل شوي، درې ورځې دوام کوي.
د پاکستان د بشري حقونو خپلواک کمېسیون هم د پښتون ژغورنې غورځنګ په وړاندې د پولیسو تاوتریخوالی غندلی دی.