اختره ومې بښه
چې ستا پستې غاړې ته
نه پوهېږم؟!
د دې روژې د اوه ویشتمې
لیله القدر دغه ښکلی امېل
څنګه ورواچومه؟
زه په ایرو کې د لاسونو سوې غوښې ټولومه ناست یم
دا ځل دې بیا او بیا او بیا…
قدردانۍ ته پوروړی شومه
۲۰۲۶/ ۱۶/۳ د روژې اوویشتمه، د کابل خونړۍ پېښې نه په اغېز
د خاورو ګټو دغه لویه ډېرۍ!!
د خاورو ګټو دغه لویه ډېرۍ!!
ګورئ! راونه سپړئ
دلته رنګونه خوشبویانې
د زمانې تورو سیلیو نه په امن کې دي
د خاورو ګټو دغه لویه ډېرۍ
پرېږدئ ارامه پرېږدئ!
د زمانې د نوی دور
تور یزید څراغ په لاس
ور پسې ګرځي
او خوشبو یې
لمر ته هم نه پرېږدي چې
هسې نه چېرته د تاریخ د حافظې برخه شي!!
له خلکو هېره کربلا به کاندي
۲۰۲۶/ ۱۶/۳ د روژې اوویشتمه، د کابل خونړۍ پېښې نه په اغېز
اووه ویشتمه
ربه یه لویه ربه!!
د اوویشتمې روژې
روح په سرو وینو سور شو
ته را ته ووایه چې
د قدر شپې رڼا مې سترګو کې ده پاتې که نه؟
چې د رڼاوو تږو کسو ته کیسې وکاندي
په زړه مې دغه لوی ارمان پاتې دی
۲۰۲۶/ ۱۶/۳ د روژې اوویشتمه، د کابل خونړۍ پېښې نه په اغېز
سوی لوګی
ما چې دنیا له تریخ لوګي نه ځاروله پوه وم
چې دلته ژوند نه په روژه نه په برات د امن ساه وباسي
دنیا د سویو غوښو درون سوي لوګي ته ګوري
او ترېنه غواړي نشه
نن یې له ما خپله نشه هېره کړه
ما د کوکنارو او د بنګو له مخ ګرد ټولاوه
ځان مې سېزه دوی ته مې ساه بښله
خو ددې وږې دنیا
د نشې سترګې څومره تږې دي او څومره وږې
چې هېڅ مړښت یې نشته
د سویو غوښو اسوېلیو ته تاوېږي ګرده
ددې نشې سیوری نن دومره درون شو
چې ان په ځمکه یې سر وګرځاوه
۲۰۲۶/ ۱۶/۳ د روژې اوویشتمه، د کابل خونړۍ پېښې نه په اغېز