تاند (چهارشنبه، د میزان ۱۱ مه) د امریکا د بهرنیو چارو وزارت ویاند ویلي چې افغانستان د امریکا په بهرنۍ پالیسۍ کې لومړیتوب لري.
ماتیو میلر پرون (سې شنبه) وویل چې د افغانستان اړوند مسلې حاضردمه د متحدو ایالتونو د سفارت د شارژدافېرې کرن ډیکر، د افغان ښځو لپاره د متحدو ایالتونو د ځانګړې استازې رینا امیري او د متحده ایالاتو د بهرنیو چارو وزارت د چارواکي مارک پومرشیم له لوري اداره کیږي.
له میلر دا څرګندونې پرون په یوه خبری کنفرانس کې د دې پوښتنې په ځواب کې وکړې چې “افغانستان د متحدو ایالتونو د بهرني سیاست لومړیتوب دی؟”
د امریکا لپاره د افغانستان د لومړیتوب په پوښټنه په داسي حال کې مطرح شوه چې د متحدو ایالتونو د باندنیو چارو وزیر د افغانستان لپاره ځانګړي استازي ته بله دنده وسپارله او بل څوک یې د افغانستان ځانګړی استازی ونه ټاکه.
تر دې مخکې پرون د امریکا د بهرنیو چارو وزیر انتوني بلېنکن وویل چې د افغانستان لپاره د امریکا ځانګړی استازی ټام ویسټ به استعفا وکړي.
د ښاغلی بلینکن په وینا، ټام ویسټ به د متحدو ایالتونو د بهرنیو چارو وزارت د بندیزونو د همغږۍ دفتر سرپرست وي.
د امریکا د باندنیو چارو وزیر انتوني بلینکن وویل، ښاغلی ویسټ، چې د ۲۰۲۱ کال په اکتوبر کې د افغانستان د ځانګړي استازي په توګه وټاکل شو، واک ته د طالبانو له راستنېدو وروسته د یوې ننګوونکې دورې په ترڅ کې د متحدو ایالتونو د پالیسۍ په جوړولو کې مهم رول لوبولی دی.
د افغانستان لپاره د امریکا ځانګړي استازي، ټام ویست ته نوې دنده وسپارل شوه