تاند ( چهارشنبه، د میزان ۱۱مه) د ننګرهار ولایت په کوټ ولسوالۍ کې سېلابونو ۷۰۰ جریبه کرنیزه ځمکه او پرې ولاړ فصلونه له منځه وړي دي.
ننګرهار کې د طالبانو د کرنې ریاست مسوولین وایي سیلابونه د کوټ ولسوالۍ په لاغرجو او فرخشاخېلو کلیو کې د تېرې ورځې د زیات باران له امله راوتلي.
د سرچینې د معلوماتو پر اساس ذکر شویو کلیو کې ۵۰۰ جریبه ځمکو کې د رومیانو، جوارو، شولو فصلونه له منځه تللي او ۲۰۰ جریبه ځمکه سېلابونو تخریب کړې.
طالب مسوولین وايي؛ که چېرې د دې سېلابونو مخنیوی ونه شي، نو په راتلونکې کې به ۱۵۰۰ جریبه نوره ځمکه هم له منځه یوسي.
سیلابونو دغه راز په یادو سیمو کې ۱۵ بندونه او سربندونه هم ویجاړ کړي، چې له یادو بندونو څخه سلګونه جریبه ځمکه خړوبېدله.