تاند (چهارشنبه، د میزان ۱۱ مه) د پښتون ژغورنې غورځنګ مشر منظوراحمد پښتین وايي، په خیبر دره کې پولیسو د پښتنو د عدالت جرګې لپاره پر ټاکلي ځای بیا برید کړی دی.
تر دې وړاندې ښاغلي پښتین نن پر خپله فیسبوکپاڼه کښلي و چې د پېښور پولیسو تېره شپه په خیبر ایجنسۍ کې د قومي جرګې د تیارۍ پر کمپ برید کړی.
خو دا په څو ساعتونو کې دوهم برید دی چې د پښتین ژغورنې غورځنګ په بلنه د پښتنو پر روان وضعیت د خبرو لپاره د جوړېدونکې جرګې پر ځای کېږي.
منظور پښتین په خپل اېکس کې د غورځنګ له ملګرو غوښتي چې د جرګې ځای ته ځانونه ور ورسوي. نوموړی وايي، بېګا هم پولیسو د دوی خېمې سوځولې او وسایل یې وړي.
ښاغلي پشتین لیکلي چې تېره شپه د پیښور له پولیسو سره څو مخ پټو کسانو د پښتون قومي عدالت په نوم د کیدونکې جرګې پر کمپ برید کړی، ډزې یې کړي او یو شمېر خیمو ته یې اور اچولی دی. پشتین زیاتوي چې د ډزو او اوښکې بهونکي ګاز د کارولو له کبله د دوی ځینې ملګري ټپیان او ځينې نور بېسده شوي دي.
د خیبر پولیسو او د خیبرپښتونخوا ایالتي حکومت تراوسه په دې اړه څه نه دي ویلي.
د پښتون ژغورنې غورځنګ په پاکستان کې د میشتو پښتنو پر ستونزو د بحث لپاره د اکتوبر پر ۱۱مه د پښتنو قومي جرګه یا عدالت په نامه جرګه رابللې
دغه غورځنګ د پښتنو بېلابېلو سیاسي، ټولنیزو او ولسي مشرانو ته دې جرګه کې د ګډون بلنه ورکړې ده.