تاند (یکشنبه، د حمل ۱۲ مه) د افغانستان د نورو برخو په شان، د ډیورنډ کرښې په پورې غاړه پښتونخوا کې هم تازه بارانونو خلکو ته مرګ ژوبله اړولې ده.
راپورونه ښيي، چې دغو بارانونو په پېښور، نوښار، شانګله، بنو او باجوړ کې یو شمېر کورونه نړولي او د ښځو او ماشومانو په ګډون یې ۷ تنه مړه او ۹ نور ژوبل کړي دي.
د بېړنیو مرستو د ادارې مشر خطیر احمد وویل چې په وژل شویو کې څلور ماشومان هم شامل دي.
ویل شوي، چې د مرګ ژوبلې تر ټولو لوی دلیل د کورونو د چتونو پرېوتل دي.
چارواکو له زیانمنو سره د مرستو په تړاو تر اوسه څه نه دي ویلي.
پښتونخوا، چې د پاکستان حکومت پرې حاکم دی، ډېر ځله د ورته طبیعي پېښو له امله قرباني شوی، خو خلک یې چارواکي دوی ته په نه پاملرنې او ورسره په توپیري چلند تورنوي.