تاند (دوشنبه، د حوت ۱۳ مه) د افغانستان او ایران د سوداګري او اقتصادي چارو مسوولانو د دوو هیوادونو ترمنځ د سوداګري اړیکو پر پراختیا ټینګار وکړ.
د ایران مهر خبري اژانس د یکشنبې په ورځ راپور ورکړ چې د ایران د ازاد صنعت- تجارت د عالي شورا منشي او د ځانګړو اقتصادي زونونو رييس حجت الله عبدالمالکي او د طالبانو د حکومت د صنعت او سوداګرۍ وزارت د نړیوالې سوداګرۍ د چارو ريیس محمدالله بختیار د دوو هیوادونو ترمنځ د سوداګرۍ د زیاتېدو پر لارو چارو خبرې وکړې.
دوی د سوداګرۍ د زیاتولو ترڅنګ د ترانزیتي او ترانسپورتي اړیکو پر پراخولو هم خبرې وکړې.
ایران اوس د افغانستان تر ټولو ستر تجارتي شریک دی. په تېرو دوو کلونو کې افغانستان تر ټولو ډېر واردات له ایرانه لرلي دي.
خو ایران ته د افغانستان صادرات خورا کم دي ځکه چې د افغانستان د وچې او تازه میوې په شمول اکثره افغاني تولیدان په ایران کې هم کېږي.
د اقتصادي چارو ځینې افغان شنونکي وايي چې افغانستان د دوو هیوادونو ترمنځ تجارتي انډول له ایران څخه د ترانزیت په وسیله برابرولی شي. د دوی په باور که ایران افغانستان ته په ترانزیت کې اسانتیاوې ډېرې کړي، افغانستان کولی شي هند او نورو هیوادونو ته د ایران له لارو صادرات ډېر کړي.
د پاکستان له لوري د لارو د بندولو، د افغان سوداګرو پر وارداتي مالونو د تعرفو د ډېرولو او نورو خنډونو له کبله افغان سوداګرو د ایران او منځنۍ اسیا لارو ته مخه کړې ده.
افغان سوداګر هیله لري چې چاه بهار بندر به د پاکستان د کراچۍ بندر ځای ورته ونیسي.