د هلمند د امنیه قومانداني وايي، د دغه ولایت په سنګین ولسوالۍ کې یوې نقلیه وسیلې ته د تېلو اچولو په ترڅ کې اور لګېدلی او له امله یې لږ تر لږه نهه کسان سخت سوځئېدلي دي.
دې قوماندانۍ نن (جمعه) په یوه خبرپاڼه کې ویلي چې پېښه د پنجشنبې په ماښام شاوخوا شپږ نیمې بجې د سنګین ولسوالۍ په دوهم تولۍ سیمه کې شوې ده.
د خبرپاڼې له مخې، اور د اسکواټر د چلوونکي د بېاحتیاطۍ او د تېلو اچولو پر مهال د سګرېټ څکولو له امله لګېدلی دی.
ټپیان د درملنې لپاره روغتون ته لېږدول شوي چې د پنځو تنو روغتیايي حالت یې نازک بلل شوی دی. د اور وژنې ځواکونو اور هم مړ کړی دی.