تاند ( پنجشنبه، د دلوې ۲۶مه) د ملګرو ملتونو د سرمنشي ویاند سټیفن دوچاریک، په دوحه کې د دغه نړیوال سازمان په کوربه توب د افغانستان په تړاو د راتلونکې اوونۍ د غونډې په تړاو د طالب چارواکو شرطونو او څرګندونو ته غبرګون ښودلی.
نوموړي ویلي: ملګري ملتونه غواړي چې د طالبانو استازي د نورو ګډونوالو ترڅنګ په دې غونډه کې ګډون وکړي.
ښاغلي دوجاریک وویل، د دې غونډې هدف دا دی چې پر افغانستان له واکمنو طالبانو سره د نړیوالو اړیکو په اړه خبرې اترې ترسره شي.
د هغه په خبره، د دې غونډې یو مهم اړخ دا دی چې هغو ځانګړیو استازیو ته چې په دې غونډه کې ګډون کوي، د دې فرصت برابر شي ترڅو په ګډه د طالبانو او د ښځو په ګډون د افغانستان د مدني ټولنې له نورو لوبغاړو سره وګوري.
دې غونډې ته پر طالبانو او د ښځو په ګډون د مدني ټولنې او د افغانستان لپاره د یو شمېر هېوادونو او سازمانونو ځانګړي استازي بلل شوي چې د امریکا له خوا پکې د افغانستان لپاره د دې هېواد د دو ځانګړیو استازیو، ټوماس ویسټ او رینا امیري ګډون تایید شوی دی.
د دوحې د راتلونکې اوونۍ د دوه ورځینۍ غونډې په اړه تر اوسه طالب چارواکو خپل ګډون مشروط ښودلی.
په دې اړه نور دلته لوستلی شئ:
د دوحې غونډې په اړه د ملا متقي او روسي سفیر لیدنه – تاند (taand.net)
د افغانستان لپاره د ملګرو ملتونو د ځانګړي استازي پر ټاکلو د امریکا ټینګار – تاند (taand.net)