تاند:( دوشنبه ، د جوزا ۸ مه ) په ننګرهار کې د زونونو په کچه د میرویس نیکه تر سرلیک لاندې د کرکټ درې ورځنۍ سیالۍ پيل شوې.
د کرکټ بورډ د معلوماتو له مخې، دا سیالۍ د کورني کرکټ په جوړښت کې د زونونو په کچه د میرویس نیکه تر نامه لاندې د دې ولايت په دوو کرکټ لوبغالو کې پیل شوې.
د يادو سیاليو په لومړۍ ورځ د غازي امان الله خان کرکټ لوبغالي کې د بست زون لوبډله د بند امیر زون له لوبډلې سره او دغه راز د نجیب الله تره کي کرکټ لوبغالي کې د سپین غر زون لوبډله د مس عینک زون لوبډلې پر وړاندې د سیالۍ ډګر ته ښکته شوې.
دغه سیالۍ به د راتلونکې جون میاشتې تر ۲۰مې نېټې دوام وکړي.