تاند/ پنجشنبه د تلې ـ میزان ۱۶مه/ د هندي سینما وتلی او تجربهکار لوبغاړی نانا پاټېکر د پنجشنبې په سهار، د ۷۵ کلونو په عمر، په ګوا کې ومړ.
د هندي رسنیو د راپورونو له مخې، پاټېکر د ګوا په دونا پاولا سیمه کې په خپل کور کې د زړه له سختې حملې وروسته بېهوښه شوی و.
نوموړی روغتون ته انتقال شو، خو ډاکټرانو ونه شو کولای چې ژوندی یې وساتي. هغه شاوخوا د سهار په ۵:۲۰ بجو مړ شو.
ډاکټرانو د هغه د ژغورلو لپاره نږدې ۴۵ دقیقې د CPR یا د زړه او ساه بیا فعالولو هڅه وکړه، خو بریالي نه شول.
د نوموړي د مړینې په اړه طبي ـ حقوقي دوسیه هم ثبت شوې او د مړینې د دقیق علت معلومولو لپاره د جسد معاینه ترسره کېږي.
نانا پاټېکر، چې اصلي نوم یې ویشوانات پاټېکر و، د هند د هندي او مرهټي ژبې سینما له تر ټولو پېژندل شوو لوبغاړو څخه و.
دهغه هنري فعالیت له څلورو لسیزو زیات دوام وکړ او په جدي، ټولنیزو او طنزي فلمونو کې یې بېلابېل رولونه ولوبول.
پاټېکر په ۱۹۷۸ کال کې د «ګمن» (Gaman) فلم له لارې سینما ته داخل شو. وروسته یې په «پرېندا» (Parinda)، «کرانتی ویر» (Krantiveer)، «ترنګا» (Tiranga)، «ویلکم» (Welcome)، «پراهاار» (Prahaar) او نورو فلمونو کې مهم رولونه ولوبول. په ۲۰۰۷ کال کې د «ویلکم» فلم د اودی شېټي رول هم هغه د نوي نسل د لیدونکو ترمنځ ډېر مشهور کړ.
نوموړي د لوبغاړي ترڅنګ د فلم جوړونکي او تیاتر د هنرمند په توګه هم فعالیت کړی و. د «کرانتی ویر» د رول له امله یې د هند ملي فلم جایزه ترلاسه کړه او په ۲۰۱۳ کال کې د هند له مهم ملکي ویاړونو څخه پدم شري هم ورکړل شو.
نانا پاټېکر له سینما بهر په ټولنیزو فعالیتونو کې هم ونډه لرله. هغه د Naam Foundation له لارې په مهاراشټرا کې د اوبو د ساتنې او د بزګرانو د کورنیو د ملاتړ په برخو کې فعالیت کاوه.
د هغه له مړینې وروسته د هند د فلمي نړۍ ګڼو هنرمندانو، سیاستوالو او نورو مشهورو څېرو خواشیني څرګنده کړې ده.
د هند د اتحادیې وزیر نیتین ګډکري ویلي چې له نانا پاټېکر سره یې ډېرې نږدې او دوستانه اړیکې لرلې او د هغه مړینه د هند د سینما لپاره لوی زیان دی.
د نانا پاټېکر مړینه د هندي او مرهټي سینما لپاره د یوې اوږدې او اغېزمنې هنري دورې پای بلل کېږي.