تاند(دوشنبه، د ثور۱۹مه) د افغانستان او پاکستان ترمنځ د کندهار په سپین بولدک ولسوالۍ کې د سوداګرۍ او ترانزیت لپاره بله لار پرانیستل شوه.
د طالبانو د حکومت رسمي خبري اژانس، باختر نن راپور ورکړ چې په سپین بولدک کې د موجود بندر ترڅنګ دا نوې لار به د دوو هیوادونو ترمنځ په سوداګري راکړه ورکړه کې ستونزې کمې او اسانتیاوې زیاتې کړي.
په خبر کې ویل شوي چې سوداګرو د دې نوې لارې د پرانیستلو هرکلی کړی او ویلي یې دي چې د دوو هیوادونو ترمنځ به د سوداګري مالونو په وړلو راوړلو کې مرسته وکړي.
وروسته له دې چې پاکستان د ډیورند پر فرضي کرښه ازغن سیم او کټارې نصب کړې، د پولو په اوږدو کې د پرتو خلکو کاروبار سخت اغېزمن شوی دی، خو دا ډول رسمي لارې که څه هم د ځايي خلکو ستونزې چندان نه حل کوي خو د هغو سوداګرو لپاره اسانتیا رامنځته کوي چې په رسمي ډول د دوو خواوو ترمنځ تجارت کوي.