تاند:( سې شنبه، د جدي ديارلسمه) پاکستان سره د مطبوعاتي ناندريو په لړ کې، د طالبانو د حاکمې ادارې وياند ذبيح الله مجاهد له پاکستاني چارواکو غوښتي چې د پارونکو خبرو پر ځای د وضعیت کابو کولو لپاره خپل مسوولیتونه تر سره کړي.
نوموړي په یوه اعلامیه کې د پاکستان د هغو تورونو او خبرداري په اړه غبرګون ښودلی، چې وايي په افغانستان کې د پاکستان د تحريک طالبان ډله پټنځايونه لري او د پاکستان خلاف بریدونه ترسره کوي.
د پاکستان د کورنیو چارو وزیر رانا ثنا الله د یادې ډلې د ځپلو لپاره په افغانستان کې د عملیاتو خبرداری هم ورکړی و، خو د طالبانو د دفاع وزارت یې په غبرګون کې وويل چې افغانستان بې څښتنه هېواد نه دی.
اوس د پاکستان دفاع وزیر په تازه مرکه کې د طالبانو اداره تورنه کړې، چې د پاکستان طالبانو ته د نه پناه ورکولو په اړه ېې خپلې ژمنې نه دي عملي کړي.
د طالبانو د ادارې ویاند ذبیح الله مجاهد د پاکستان د وروستیو تورونو او خبرداري په غبرګون کې ویلي:« پاکستانی اړخ هم مسولیت لري چې د وضعیت د کابوکیدو هڅې وکړي، له بې اساسه خبرو او پارونکو نظریاتو ورکولو څخه ډډه وکړي، ځکه داسې خبرې او بې باورۍ د هيڅ اړخ په ګټه نه دي.»
د طالبانو او پاکستان ناندرۍ په داسې حال کې دي، چې يو شمېر شنونکي تحریک طالبان پاکستان د پاکستان يوه استخباراتي پروژه ګڼي او وايي، له دې ډلې د پښتنو سيمو د ناامنه او وروسته پاتې ساتلو تر څنګ د دوی خلاف د عملياتو په نوم نړيوالو نه مرستې او امتيازات ترلاسه کوي.