تاند:( سې شنبه، د جدي ديارلسمه) په هرات او بلخ کې د ايران کونسلګريو د خپل وژل شوي استخباراتي مشر قاسم سلیماني د وژل کیدو د تلین په مناسبت د بشري مرستو د ویش تر څنګ ځینې نور پروګرامونه تر سره کړي.
د ايران د سپاه پاسداران استخباراتي ځواک اړوند تسنیم خبري اژانس ویلي، چې هېواد ېې په هرات کې ۶۰۰ تنو بېوزلو ته تر ۱۰ ټنه پورې خوراکي او نورې مرستې وېشلي.
سلیماني د ایران د سپاه پاسداران استخباراتي ځواک مشر و، چې څو کاله مخکې د امریکایي ځواکونو د برید پر مهال د عراق په پلازمېنه بغداد کې ووژل شو.
نوموړی په سيمه کې د ایران د استخباراتي پروژو د عملي کیدو مهم تطبيقونکی بلل کیده او ويل کېږي، چې طالبانو سره د ایران مخکینۍ ترينګلې اړيکې هم هغه ترمیم او د طالبانو د مالي او تسلیحاتي ملاتړ له لارې د دوی بیرته واکمنيدو سره مرسته وکړه.
د چارو شنونکي ايران د داسې مرستو د ویش او قاسم سلیماني ته د تبليغاتو له لارې په افغانستان کې د نفوذي سياستونو او لاسوهنو په ترسره کولو تورنوي.
دوی د طالبانو له حاکمې ادارې غواړي، چې هېواد کې د ايران د لاسوهنو د دوام مخه ونيسي.