تاند(یکشنبه، د سرطان ۱۸ مه) د افغانستان د هوا پيژندنې ادارې د نن او سبا لپاره په ۱۴ ولایتونو کې د بارانونو او سیلونو وړاندوینه کړې ده.
په دې ولایتونو کې، بدخشان، کونړ، نورستان، لغمان، ننګرهار، کابل، لوګر، پکتیا، خوست، پکتیکا، غزني، کندهار او زابل ولایتونه شامل دي.
دې ادارې ویلي چې په بېلابېلو سیمو کې د ورښت اندازه له ۱۰ څخه تر ۳۵ میلي متره پوري اټکل شوې ده.
د راپورونو له مخې، په نورستان او غزني کې سیلونو لږترلږه ۱۴ تنه مړه کړي او ډېر مالي تاوانونه یې اړولي دي.
د نورستان ولایت په وامه ولسوالي کې د سیل له کبله ۹ تنه مړه شوي او ۹ نور ژوبل دي.
ځايي چارواکي وايي چې د تېرې شپې د سیل له کبله د کوردار په نوم پُل ویجاړ شوی دی.
په غزني کې تېره شپه په دغه ولایت کې د سختو ورښتونو، سېل او توپان له کبله ۵ تنه مړه شوي او سلګونه کورونه ویجاړ شوي دي.