تاند (یکشنبه، د رمري/ اسد ۱۸ مه) د افغانستان په لوېدیځ هرات ولایت کې د سمینټو د یوې سترې فابریکې د جوړولو چارې رسماً پیل شوې.
په دې پروژه کې به ۱۴۳ میلیون ډالره پانګونه وشي او تمه ده زرګونو کسانو ته د کار زمینه برابره کړي.
د پروژې د بنسټ اېښودو مراسم د یکشنبې په ورځ د اسلامي امارت د اقتصادي او اداري چارو د مرستیالانو او یو شمېر وزیرانو په ګډون جوړ شول.
د کانونو او پټرولیم وزارت ویاند همایون افغان ویلي، د دې پروژې قرارداد له یوه خصوصي کورني شرکت سره شوی او ټاکل شوې چې د فابریکې د جوړولو چارې په دوو کلونو کې بشپړې شي.
د وزارت د معلوماتو له مخې، فابریکه به له فعالېدو وروسته هره ورځ شاوخوا ۳ زره ټنه سمنټ تولید کړي.
چارواکي وايي، د دې پروژې له لارې به شاوخوا ۵ زره کسانو ته مستقیم او غیرمستقیم د کار زمینه برابره شي.
دا فابریکه د هرات ښار د لوېدیځ په شاوخوا ۳۰ کیلومتره واټن کې په زندهجان ولسوالي کې جوړېږي.
چارواکي تمه لري چې د فابریکې له فعالېدو سره به د افغانستان د سمنټو کورنی تولید زیات او پر وارداتي سمنټو تکیه کمه شي.