تاند ( یکشنبه د اسد/زمري ۱۸مه) افغانستان کې د طالبانو حکومت مسوولان وايي، د پاسپورټ عمومي ریاست په تېر یوه کال کې له ۶۵۰ زرو څخه زیات عادي پاسپورټونه وېشلي دي.
د طالبانو د حکومت ویاند، ذبیحالله مجاهد، نن (یکشنبه، د اسد ۱۸مه/د اګست ۹مه) د «حکومت د مطبوعاتو په هنداره کې» په پروګرام کې ویلي چې په تېر یوه کال کې د څه باندې ۱۶ زرو بهرنیو وګړو ویزې هم تمدید شوې دي.
د مجاهد په وینا، د پاسپورټ عمومي ریاست د پاسپورټ د ثبت فورمې له ۹ پاڼو څخه یوې پاڼې ته په راکمولو سره د خدمتونو بهیر چټک او اسانه کړی دی.
که څه هم د پاسپورټونو د وېش شمېر د پام وړ دی، خو لا هم ډېر افغانان د پاسپورټ د ترلاسه کولو پر مهال له بېلابېلو ستونزو سره مخ دي.
دوی وایي، د اوږدو کتارونو، د نوبت د ترلاسه کولو ستونزې، د معلوماتو د ثبت په برخه کې ځنډ او په ځینو مواردو کې د لرې پرتو ولایتونو د اوسېدونکو لپاره د سفر او لګښتونو ستونزې، د خلکو بهیر لا هم ستونزمنوي.
کارپوهان وایي، پاسپورټ د بهرنیو سفرونو، زدهکړو، درملنې او کاري فرصتونو لپاره د ډېرو افغانانو یوه مهمه اړتیا ده.
د دوی په وینا د دې ستونزو د حل لپاره اړینه ده چې د پاسپورټ د وېش بهیر لا ډېر ډیجیټل او غیرمتمرکز شي او په ولایتونو کې د خدمتونو مرکزونه پیاوړي شي.
همدارنګه باید د نوبت، ثبت او پاسپورټ د ترلاسه کولو په ټولو پړاوونو کې روڼتیا او چټکتیا یقیني شي، څو خلک له اضافي لګښتونو او اوږده انتظار څخه وژغورل شي.