تاند( پنج شنبه، د جوزا ۲۶ مه) له هرات څخه بېلابېل خبرونه څرګندوي، چې د طالبانو امنیتي ځواکونو نن يو موبايل پلورونکی ډبولی، د جمهوري نظام د امنيتي ځواکونو د کورونو پلټل ېې پیل کړي او همدا شان په محکمو کې ېې د ژوند له ملګرو څخه د مېرمنو د شکایتونو د نه ثبتولو پریکړه کړې ده.
د ځایي سرچينو په حواله، يوه طالب د هرات ښار د ګلانو چوک له یوه موبايل پلورونکي څخه موبايل اخیستی و او بېرته ېې غوښتل، چې موبایل پلورونکی ورڅخه واخلي.
ویل شوي، چې موبایل پلورونکی د طالب جنګیالي د غوښتنې د نه منلو له کبله ډبول شوی او هم ېې د هټۍ شاوخوا ډزې شوي دي.
بل لور ته: باوري ځايي سرچینې وایي، چې طالبانو د هرات محکمه کې د هغو ښځو شکایتونه رد کړي، چې د خپلو خاوندانو پر وړاندې یې ثبت کړي دي.
په ورته وخت ويل کيږي، چې طالبانو په هرات کې د جمهوري نظام د امنيتي او دفاعي ځواکونو د کورونو پلټنه پیل کړې ده.
ويل شوي، چې طالبانو د دغو پلټنو پر مهال د پخوانيو امنیتي ځواکونو کورنۍ ځورولي او ډېر ځواکونه ېې له وېرې د ډکو کورونو پریښودو ته مجبوره شوي دي.
طالبانو د دغو خبرونو په اړه څه نه دي ويلي.