په ۳۶۳ پاڼو او پنځو برخو کي د نومیالي افغان شاعر عبدالباري جهاني دا شعري ټولګه د پیمان په نامه د نوموړي د وروستیو درېیو کلونو د شعرونو مجموعه ده. په دې ټولګه کي ۵۵ غزلې، ۲۳ بېلابېل نظمونه، ۱۹ منظومې ژباړې، ۳۷ کیسه ییز شعرونه او ۱۱۱ څلوریزې راغلي دي.
د کتاب پیل د دغو پنځونو د څرنګوالي او شعر لیکلو سره د اړیکي په اړه د شاعر له سریزې کېږي. ښاغلی جهاني د کتاب د نامه په اړه لیکي: «د خپلي دیارلسمي شعري ټولګي لپاره مي د پیمان نوم ځکه انتخاب کړ چي زه له خپلي لومړنۍ ځوانۍ څخه د خپل عمر تر دې وروستي پړاو پوري په نظم، په نثر، په نظر او په عمل کي د خپل اولس سره پر خپله هغه ژمنه او پیمان باندي ټینګ پاته سوی یم چي زما اود مقابل لوري ترمنځ لاسلیک سوی نه دی بلکه پخپله مي په خپل ذهن کي وعده کړې او پخپله مي عملي کړې ده.»
پیمان دا مهال د نړۍ په بېلابېلو برخو کي د لولو ویبپاڼي څخه په چاپي بڼه تر لاسه کېدلای سي او په نږدې راتلونکي وخت کي به په افغانستان او پښتونخوا کي هم تر کتاب پلورنځیو ورسېږي.
له ورکي مېني تر پیمانه د دیارلسو شعري ټولګو د خپرولو ترڅنګ ښاغلي جهاني ۲۷ نور شعري او نثري آثار لیکلي او پنځولي دي چي ټولیز شمېر یې څلوېښتو ته رسېږي.
ډاکټر هارون حکیمي