تاند( پنج شنبه، د جوزا ۲۶ مه) د افغانستان د سقوط شوي جمهوري نظام وروستی لوی درستیز جنرال هیبتالله علیزی د امریکايي چارواکو له هغو فشارونو پرده پورته کړه، چې په وینا یې د طالبانو او امریکا د دوحې د سولې تړون د بریالیتوب لپاره یې د جمهوريت ځواکونه د طالبانو د ځپلو جګړې ته ډېر نه پريښودل.
د نوموړي په وينا، د جمهوريت له سقوط څخه مخکې ېې له امریکایي چارواکو څخه په پرله پسې ډول د جګړې د ودرولو پيغامونه تر لاسه کول.
پخواني لوی درستيز په واشنګټن کې يوې غونډې ته د وينا پر مهال دا هم ويلي، چې د امنيتي او دفاعي سکتور په رهبرۍ کې د ولسمشر غني او حمدالله له لوري پراخ بدلونونه د دغه سکتور د پاشلتيا او ماتې يو عامل و.
د ده په وينا، د جګړې پر مهال ډېری هغه کسان چې په دندو کې ناکام شوي وو، د ولسمشر غني او حمدالله محب له لوري ګومارل شوي وو.
جنرال علیزی د ولسمشر غني له لوري د جمهوري نظام له سقوط څخه پينځه ورځې مخکې د ملي پوځ لوی درستیز ټاکل شوی و.
د افغانستان د سقوط شوي جمهوري نظام نورو لوړپوړو چارواکو د هغه د يادو څرګندونو په اړه څه نه دي ويلي، خو د پرزول شوي نظام ډېر پلويان امريکا د نظام د سقوط يو اصلي لامل ګڼي او تور لګوي، چې د پردې تر شا يې طالبانو سره پټې معاملې لرلې.