تاند(سې شنبه، د جوزا ۱۷ مه) د افغانستان د بی واکه شوي ولسمشر محمد اشرف غني لومړي مرستيال امرالله صالح د پرزول شوي جمهوري نظام پر هغو چارواکو توندې نيوکې کړي، چې په وروستيو کې د طالبانو په بلنه له بهر څخه هيواد ته ستنيږي.
نوموړي ويلي، چې دغه چارواکي په دې ډول طالبانو ته د خپل وجدان مرګ او هغه عزت او وقار، چې دوی یې وړتیا نه لرله، ور ډالۍ کوي.
صالح زیاتوي، چې دا کسان به له مړینې وروسته بې بیرغه وي او د جنازې امام به ېې نه پوهیږي، چې دوی په کوم نوم ياد کړي.
امرالله صالح دغو پخوانيو چارواکو ته د پېغور په ډول وايي، چې د هېواد لسګونه زره تنو د هغه نظام او دولت د ساتلو لپاره سرونه قربان کړل، چې دوی پکې د قدرت پر ګدۍ تکیه وهلې وه.
نوموړی وړاندې زياتوي:« زه هیڅ شک نه لرم، چې طالب به د شرف او عزت دغو معامله ګرانو ته د ځان پلورونکو او ټولنه به ورته د خباثت او ذلت د سمبولونو په سترګه ګوري».
دا په داسې حال کې ده، چې له څه مودې راهيسې د جمهوري نظام يو شمېر منسوبین د طالبانو په بلنه هېواد ته ستانه شوي.
يو شمېر خلکو د دغو پخوانيو چارواکو راستنیدل ستايلي او دا یې له هېواد سره د دوی مینه ګڼلې ده.