تاند(جمعه، د حوت ۲۷ مه) په افغانستان کې د ط حکومت د ملګروملتو د امنیت شورا له لوري د افغانستان د یوناما د ماموریت د تمدیدېدو هرکلی وکړ.
د ملګروملتو امنیت شورا په داسې حال کې په افغانستان کې د یوناما ماموریت د یوه بل کال لپاره تمدید کړ چې اندېښنه وه د دغه ماموریت پر سر د لویو قدرتونو ترمنځ اختلاف دی.
د طالبانو د حکومت ویندوی ذبیح الله مجاهد نن فرانس پریس خبري اژانس ته وویل:«موږ د یوناما د ماموریت اوږدېدا یو ښه ګام ګڼو او ورڅخه غواړو چې په افغانستان کې د بشري او نورو ستونزو په حل کولو کې اغېزمن کار وکړي.»
د افغانستان لپاره د ملګروملتو ځانګړی ماموریت لومړی پلا په ۲۰۰۲ م کال پیل شو. ملګروملتو د افغانستان د دفتر له لارې نه یوازې له افغانستان سره د بشري مرستو په رسولو کې ونډه اخیستې بلکې د بشري حقونو د دفاع ترڅنګ یې په سیاسي او سیمه ییزو همکاریو کې هم برخه اخیستې ده.
په اوس وخت کې، چې د نړیوالو مرستندویانو په وینا، ۳۸ ملیونه افغانان له لوږې سره مخامخ دي، په افغانستان کې د ملګروملتو ماموریت لا مهم رول لرلی او نړیوالې مرستې افغانستان ته جلبولی شي.
سږ کال ډېر ډاډ نه و چې په افغانستان کې به د ملګروملتو ماموریت تمدید شي او که نه شي ځکه چې د امنیت شورا یو دایمي او د وېټو حق لرونکی هیواد روسیه د دې ماموریت له اوږدولو سره ډېره لېواله نه وه.
خو روسیې په غونډه کې بیخي ګډون ونه کړ.
د امنیت شورا له لوري د افغانستان د ماموریت تصویب به د افغانستان لپاره د سرمنشي ځانګړې استازې دیبرا لاینز ته موقع ورکړي چې په افغانستان کې خپل کار ته دوام ورکړي.